«Qamqorlyq» jobasy aiasynda aýtizm men psihikalyq aýytqýlary bar balalarǵa arnalǵan 8 kúndizgi ortalyq ashylady, dep habarlaidy QazAqparat.
Májilistiń jalpy otyrysynda QR Premer-Ministriniń orynbasary Eraly Toǵjanov osyndai málimet berdi.
«Biz kúnkóris deńgeii kedeilik sheginen tómen otbasylarǵa ataýly áleýmettik kómek kórsetemiz. Búginde osyndai kómekti 95 myń otbasy alyp otyr.
2020 jyly azamattardyń talap-tilekteri eskerile otyryp ataýly kómekti taǵaiyndaý mehanizmi ózgertilip, 25 tabys túri men áleýmettik tólem alynyp tastaldy.
Kómek alýshylardy eńbekke yntalandyrý tásilderi engizildi. Eger eńbekke qabiletti azamattar usynylǵan jumystan bas tartsa, ataýly kómek 6 aiǵa toqtatylady. Bul ataýly áleýmettik kómektiń masyldyqqa ainalýyn boldyrmaýǵa baǵyttalǵan. Sondyqtan ataýly áleýmettik kómekti basqa járdemaqylarmen salystyrýǵa bolmaidy», - dedi Eraly Toǵjanov Parlament Májilisiniń jalpy otyrysynda.
Sondai-aq, ol muqtaj azamattarǵa proaktivti formatta kómek kórsetý úshin memlekettik organdardyń 20 tsifrlyq qosymshasyn integratsiialaý arqyly Otbasynyń tsifrlyq kartasy ázirlenetinin aitty.
«Múgedektigi bar adamdardy ońaltý qyzmetimen qamtamasyz etý maqsatynda 2021-2023 jyldary respýblikalyq biýdjet esebinen 12 ońaltý ortalyǵyn salý josparlanǵan, onyń 5-eýiniń qurylysy byltyr bastaldy.
Sondai-aq, «Qamqorlyq» jobasy aiasynda aýtizmmen syrqat jáne basqa da psihikalyq aýytqýlary bar balalarǵa arnalǵan 8 kúndizgi ortalyq ashý josparlanýda. Osyndai 17 ortalyq byltyr ashylyp, qoldanysqa berildi», - dedi vitse-Premer.
