Koronavirýs juqtyrý oqiǵalary Aýstraliia men Frantsiiada tirkeldi, dep habarlaidy "Ult aqparat".
Er adam Aýstraliianyń Viktoriia shtatyndaǵy Melbýrn aýrýhanasynda izoliatorda jatyr.
Melbýrnda jatqan naýqas - 50 jastaǵy qytailyq azamat. Jaqynda ǵana 2019-nCoV koronavirýsynyń oshaǵy Ýhan qalasynan kelgen.
Ol Melbýrnge Gýanchjoýdan China Southern Airlines CZ321 reisimen 19 qańtar, jeksenbi kúni jetken. Kelmes buryn 2 apta Ýhan qalasynda bolǵan.
Onyń jaǵdaiy qalypty dep baǵalanýda jáne dárigerlerdiń jiti baqylaýynda.
Viktoriia shtatynyń densaýlyq saqtaý ministrligi koronavirýs juqtyrǵan adamdar taǵy anyqtalýy múmkin ekenin málimdep, Gýanchjoýdan kelgen reiste bolǵan basqa da jolaýshylarmen bailanys ornatyp jatyr.
Sondai-aq, Frantsiianyń densaýlyq saqtaý ministri Anes Býzin arnaiy baspasóz konferentsiiasyn ótkizip, elde eki adamdy arnaiy tekserý oń nátije berip, olardan koronavirýs anyqtalǵanyn habarlady.
Onyń aitýynsha, naýqastardyń biri Bordodaǵy emhanaǵa jatqyzyldy, ekinshisi Parijde dárigerlerdiń baqylaýynda.
Bordoda jatqan azamat jaqynda Qytaidan oralyp, sodan keiin Niderlandyǵa sapar shekkenin aitty. Ekinshi virýs juqtyrǵan azamat ta Qytaiǵa saparmen barǵan.
Aita ketý kerek, Qytai resmi túrde dúisenbi kúni virýstyń adamnan adamǵa juǵýy múmkin ekenin málimdedi. Ol elde koronavirýstyń jańa túrin juqtyrǵandar sany 440 adamǵa jetkeni jáne osy aýrýdan toǵyz adamnyń kóz jumǵany habarlandy. Sondai-aq, Qytaida taraǵan pnevmoniia Tailand pen AQSh-ta tirkeldi.
Qazaqstan saqtyq sharasy retinde koronavirýsty anyqtaityn praimerlerdi satyp alýdy bastady. QR Densaýlyq saqtaý ministrligi elimizde koronavirýstyq infektsiia tirkelmegenin resmi aitty.
