Aýstraliia ashyq chempionatyn asyǵa kútýdemin. Bul týraly qazaqstandyq tennisshi Zarina Diias málim etti, dep habarlaidy "Ult aqparat" Qazaqstan tennis federatsiiasyna silteme jasap.
Z.Diias qatań karantin jaǵdaiynda jatqan tennisshiler qatarynda joq ekendigin jetkizdi.
«Keste boiynsha jattyǵa alamyn. Bizdi bekitilgen kestege sáikes birneshe saǵatqa kortqa jiberedi. Aýstraliia ashyq chempionatyna ázirlik jaqsy ótýde. Australian Open aldynda 31 qańtar men 6 aqpan aralyǵynda ótetin taǵy bir jarysqa qatysamyn. Ázirge qaisysy (Gippsland Trophy nemese Yarra Valley Classic) ekeni belgisiz. Bul týrnirge oiynshylardy jerebe, álde reiting boiynsha ma, qalai bóletinin bilmeimin», dedi Z.Diias.
Zarinanyń sporttaǵy mańyzdy belesi osy Aýstraliia ashyq chempionatymen bailanysty. 2014 jyly 20 jastaǵy Z.Diias úshinshi ainalymǵa deiin jetip, onyń reitingte joǵary kóterilý joly bastalǵan bolatyn.
Al ótken jyly Qazaqstan tarihynda tuńǵysh ret úsh birdei tennisshimiz «Úlken dýlyǵa» týrniriniń úshinshi ainalymyna ótti. Biyl da qazaqstandyq sportshylardyń baryn salatyny anyq. Degenmen qatań karantinde jatqan Iýliia Pýtintseva men Elena Rybakinaǵa mundai shekteý ońai timeýde.
