Aýǵanstannyń jańa biligimen beiresmi dialogqa bastama jasaý qajet. Bul týraly Dýshanbede ótken ShYU-ǵa múshe memleketter basshylary keńesinde QR Prezidenti Qasym-Jomart Toqaev aitty, dep habarlaidy QazAqparat.
«Ujymdyq qaýipsizdik shart uiymy men Shanhai yntymaqtastyq uiymy elderi Aýǵanstannyń jańa biligimen beiresmi dialogqa bastama jasaýy qajet. Mundai kommýnikatsiia tálipteriniń shynaiy nietin baǵalaýǵa, syn-qaterge, óńirlik turaqtylyqqa qatysty jalpy paiym jasaýǵa jáne bulelmen saýda-ekonomikalyq bailanysty qalpyna keltirýge múmkindik beredi. Buǵan qosa, bul kezeńde resmi taný týraly sóz qozǵalyp otyrǵan joq», - dedi QR Prezidenti.
Memleket basshysy kóp jaǵdai Aýǵanstannyń jańa ákimshiliginiń is júgindegi aldaǵy qadamyna, sonymen qatar BUU Qaýipsizdik keńesiniń tiisti sheshimderine bailanysty bolatyndyǵyn basa aitty.
«ShYU men UQShU múddeleri jáne birlesken kúsh-jigeri ushtasyp, ulanǵaiyr óńirimizdiń qaýipsizdigi men turaqty damýyndaǵy ózekti problemalardy sheshýdegi áreketterimizdiń jalpy tiimdiligin arttyrýǵa múmkindik beredi dep úmittenemin», - dedi Qasym-Jomart Toqaev.
