Ahmad Masýd jetekshilik etetin Ulttyq qarsylyq maidany (UQM) AQSh-ta óz ókildigin tirkedi. Bul maidan Aýǵanstanda bilikti basyp alǵan "Taliban" radikal qozǵalysymen (Qazaqstanda jáne basqa da kóptegen elderde tyiym salynǵan) kúresip júr, dep jazady Azattyq.
AQSh-ta ókildik tirkelgeni jóninde 28 qazanda Ulttyq qarsylyq maidany syrtqy bailanys bóliminiń basshysy Áli Maisam Nazari habarlady. Onyń aitýynsha, AQSh-taǵy ókildik - Aýǵanstan ulttyq qarsylyq maidanynyń sheteldegi alǵashqy missiiasy.
Endi UQM óz múddesin shetelde resmi túrde qorǵap, amerikalyq saiasatkerlerdi aýǵan oppozitsiiasyna kómektesýge kóndirýge tyrysady, deidi Áli Maisam Nazari. Qarsylyq maidanynyń resmi ókiliniń aitýynsha, AQSh áskeri-saiasi uiymdy tirkeýge ruqsat bere bermeidi.
Áli Maisam Nazari eki kún buryn áleýmettik jelide UQM saiasi qyzmetin de jandandyratynyn jazǵan. Jaqynda ol Aýǵanstandaǵy jaǵdaidy Italiia parlamentiniń depýtattarymen birge talqylaǵan. Áli Maisam Nazari kezdesý túsirilgen sýretterdi jelide jariialady.
Aýǵanstan ulttyq qarsylyq maidany, biyl tamyzda "Taliban" Kabýldy basyp alǵannan keiin, Panjsher provintsiiasynda quryldy. Radikal qozǵalys biligin moiyndaýdan bas tartqan kúshter Ahmad Masýd mańaiyna toptasty.
Qazir Panjsherde ne bolyp jatqany beimálim. Tálipter provintsiiada uialy bailanys pen internetti úzip, shatqalǵa baratyn joldardyń bárine baqylaý ornatty.
Eki apta buryn Panjsherde bir top adamdy bir qorymǵa kómgeni týraly málimet tarady. Biraq tálipter "beibit panjsherlikterdi qyrǵan" degen aiypty joqqa shyǵaryp otyr.
