VVS telejúrgizýshisi Ialda Hakim Aýǵanstanda týǵan. Onyń otbasy 80-jyldary basqa elge kóship ketken, biraq keiin ol Aýǵanstanǵa jýrnalist retinde birneshe ret kelgen. Ol el biligin tálipter (Qazaqstanda tyiym salynǵan uiym) óz qolyna alǵannan keiin alǵash ret otanyna kelip tur, dep habarlaidy QazAqparat VVS agentigine silteme jasap.
«Aýǵanstanda densaýlyq saqtaý júiesiniń qyzmetkerleri – Kandagardaǵy dárigerlerden Kabýldaǵy aýrýhananyń eden jýýshylaryna deiin buǵan deiingi úkimet qulaǵannan keiin jáne sheteldik kómek toqtaǵannan coń jalaqy almaǵan. Olar ózderi de asharshylyq aldynda tur, biraq soǵan qaramastan jumysqa baryp, adamdarǵa kómektesip jatyr», - deidi jýrnalist. Nasrin Aýǵanstan astanasy Kabýldegi Indira Gandi atyndaǵy aýrýhanada eden jýýshy bolyp jumys isteidi.
«Eger biz jumysqa shyqpasaq, bul balalar ólip qalady. Biz olardy qalai tastap ketemiz?», - dedi ol.
Kishkentai patsientterdiń basym bóligi tamaq toiyp ishpegendikten óte álsiz. Palatalar infektsiia juqtyryp almaýy úshin taza bolýy tiis. Nasrinniń aitýynsha, onyń kólikke minetin aqshasy joq. Ol jumysqa jaiaý keledi. 12 saǵattyq aýysymnan keiin taý jotasymen tómen túsip, keiin qaita taýǵa shyǵady.
BUU baǵalaýy boiynsha, 23 million aýǵandyq ashtyqtan kóz jumýy múmkin. Turǵyndardyń 95%-y toiyp tamaq ishpeidi. «Talibannyń» resmi ókili Sýheil Shahin bárine halyqaralyq qoǵamdastyqty kinálap otyr. Onyń aitýynsha, aýǵan halqy Batystyń kesirinen japa shegip otyr.
«Olar eldiń quldyrap jatqanyn, asharshylyq aldynda turǵanyn aitýda – bul qaiǵyly jaǵdaidyń aldyn alý úshin birdeńe istesin. Adam quqyǵy týraly aityp júrgen elder, halyqaralyq qoǵamdastyqtar Aýǵanstandy gýmanitarlyq kriziske ákeletin áreketterin toqtatsyn», - deidi Shahin.
