Aýǵanstannyń 2 azamatyn Reseige zańsyz ótkizbek bolǵan qazaqstandyqqa sot úkimi shyqty. Bul týraly QR IIM Kóshi-qon qyzmetiniń erekshe tapsyrmalar jónindegi aǵa inspektory Baýyrjan Omarov málim etti, dep habarlaidy QazAqparat.
«Ótken aptada ǵana Qostanai oblystyq soty Aýǵanstannyń eki azamatyn tún ishinde memlekettik shekaradaǵy ótkizý pýnktterin ainalyp ótip, Reseige zańsyz kóshi-qon uiymdastyrmaq bolǵan Qazaqstan azamatyna úkim shyǵardy», - dedi ol Ishki ister ministrliginde ótken brifing barysynda.
Sonymen qatar ol sheteldikterdiń elimizdiń aýmaǵynda ruqsat qujattaryn alýdyń zańsyz jańa túri paida bolǵanyn aitady.
«Máselen, Almaty qalasynda bir páterde tirkelgen 7 jaýapkershiligi shekteýli seriktestigi anyqtaldy. Olar eshqandai qyzmet atqarmaǵan, biýdjetke salyq ta, tólemder de jasamaǵan. Biraq, atalǵan zańdy tulǵalar sheteldikterge 16 viza rásimdegen. Bul fakti boiynsha tergeý bastaldy», - dedi Baýyrjan Omarov.
