اۋعانستاننىڭ 2 ازاماتىن رەسەيگە زاڭسىز ٶتكٸزبەك بولعان قازاقستاندىققا سوت ٷكٸمٸ شىقتى. بۇل تۋرالى قر ٸٸم كٶشٸ-قون قىزمەتٸنٸڭ ەرەكشە تاپسىرمالار جٶنٸندەگٸ اعا ينسپەكتورى باۋىرجان وماروۆ مەلٸم ەتتٸ, دەپ حابارلايدى قازاقپارات.
«ٶتكەن اپتادا عانا قوستاناي وبلىستىق سوتى اۋعانستاننىڭ ەكٸ ازاماتىن تٷن ٸشٸندە مەملەكەتتٸك شەكاراداعى ٶتكٸزۋ پۋنكتتەرٸن اينالىپ ٶتٸپ, رەسەيگە زاڭسىز كٶشٸ-قون ۇيىمداستىرماق بولعان قازاقستان ازاماتىنا ٷكٸم شىعاردى», - دەدٸ ول ٸشكٸ ٸستەر مينيسترلٸگٸندە ٶتكەن بريفينگ بارىسىندا.
سونىمەن قاتار ول شەتەلدٸكتەردٸڭ ەلٸمٸزدٸڭ اۋماعىندا رۇقسات قۇجاتتارىن الۋدىڭ زاڭسىز جاڭا تٷرٸ پايدا بولعانىن ايتادى.
«مەسەلەن, الماتى قالاسىندا بٸر پەتەردە تٸركەلگەن 7 جاۋاپكەرشٸلٸگٸ شەكتەۋلٸ سەرٸكتەستٸگٸ انىقتالدى. ولار ەشقانداي قىزمەت اتقارماعان, بيۋدجەتكە سالىق تا, تٶلەمدەر دە جاساماعان. بٸراق, اتالعان زاڭدى تۇلعالار شەتەلدٸكتەرگە 16 ۆيزا رەسٸمدەگەن. بۇل فاكتٸ بويىنشا تەرگەۋ باستالدى», - دەدٸ باۋىرجان وماروۆ.
