Memleket basshysy Qasym-Jomart Toqaev Qazaqstan Prezidentiniń Aýǵanstan boiynsha Arnaiy ókili Talǵat Qalievti qabyldady, dep habarlaidy Aqordanyń baspasóz qyzmeti.
Memleket basshysy aýǵan protsesin retteý jumystaryn jandandyrýdy eskere otyryp, Aýǵanstan boiynsha Arnaiy ókildiń tiimdi qyzmetiniń mańyzdylyǵyn atap ótti. Prezidenttiń pikirinshe, atalǵan elde berik beibitshilik ornatý máselesi Qazaqstannyń uzaq merzimdi ulttyq múddesimen sai keledi. Sonymen qatar Ortalyq Aziiada turaqtylyq pen qaýipsizdikti nyǵaitýǵa yqpal etedi.
– AQSh pen «Taliban» qozǵalysy ókilderiniń arasyndaǵy kelisimnen keiin Aýǵanstanǵa qatysty geosaiasi jaǵdai jańa kezeńge aiaq basty. Aýǵanstan men onyń tóńiregindegi qazirgi úrdisterdiń qarqynyn jiti baqylap, bul eldegi ulttyq kelisim men qaita qalpyna keltirý protsesine kómektesý kerek, – dedi Qasym-Jomart Toqaev.
Qazaqstan Prezidenti Arnaiy ókilge aýǵan problemasy boiynsha ekijaqty formatta jáne kópjaqty kelissózder mehanizmderi aiasynda shet eldik seriktestiktermen birlese otyryp, tyǵyz jumys isteýdi tapsyrdy. Bul terrorizm, ekstremizm, zańsyz migratsiia jáne esirtki tasymaly siiaqty qaýip-qaterlerge qarsy kúres turǵysynan alǵanda da mańyzdy sanalady.
Memleket basshysy Qazaqstannyń aýǵan baǵytyndaǵy saýda-ekonomikalyq maqsattaryn meilinshe belsendi túrde iske asyrý kerek ekenin atap aitty.
