Qasym-Jomart Toqaev Aýǵanstandaǵy ahýalǵa bailanysty qabyldanǵan sheshimder men atqarylyp jatqan jumystar týraly aityp berdi, - dep habarlaidy Tengrinews.kz agenttigi. Bul týraly ol Aqorda rezidentsiiasynda on memlekettiń jańadan taǵaiyndalǵan tótenshe jáne ókiletti elshileriniń Qazaqstan Prezidentine senim gramotalaryn tapsyrý rásiminde málimdedi.
"Aýǵanstandaǵy shielenisken máselelerdi retteý úshin Qazaqstan sheteldik seriktesterimen tize qosyp jumys istep keledi. Biz, eń aldymen, sol jerdegi otandastarymyzdy uiymdasqan túrde evakýatsiialaýdy qamtamasyz ettik. Endi biz Aýǵanstandaǵy qazaq diasporasynyń múshelerin, iaǵni qandastarymyzdy elge qaitarý máselesin qarastyryp jatyrmyz. Gýmanitarlyq ustanymdarǵa sáikes, aýǵanstandyq 57 stýdenttiń bilim berý vizalaryn uzarttyq. Sonymen qatar bortynda shetel azamattary bar ushaqtarǵa janarmai quiý úshin tranzittik áýe dálizderi men qoný alańdaryn usyndyq. BUU-nyń Aýǵanstan jónindegi agenttikteriniń qashyqtaǵy ýaqytsha keńsesi Almaty qalasyna ornalastyryldy", - dedi Memleket basshysy.
Sonymen qatar, Prezident elimizdiń COVID-19 pandemiiasymen kúres kezinde halyqaralyq seriktesterimen yntymaqtastyǵyn atap ótti.
"Qazirgi ýaqytta adamzat COVID-19 pandemiiasynan meditsinalyq, áleýmettik jáne ekonomikalyq daǵdarystan zardap shegýde. Bul halyqaralyq júieniń ǵalamdyq tótenshe jaǵdailarǵa qanshalyqty daiyn emes ekenin kórsetti. Pandemiiamen kúreste Qazaqstan óziniń jahandyq seriktesterimen yntymaqtastyqtyń arqasynda Reseiden, Qytaidan jáne AQSh-tan vaktsinalar jetkizýdi qamtamasyz etip keledi. Elimiz tiimdi, eń bastysy, qaýipsiz vaktsina jasap shyǵardy. Dúniejúzilik densaýlyq saqtaý uiymynyń sertifikatyn alǵannan keiin biz olardy shetelderge jetkize alamyz. Pandemiia, jappai qyryp-joiý qarýynyń taralýy jáne klimattyń ózgerýi siiaqty ǵalamdyq qaýip-qaterlermen kúreste kúsh biriktirgenimiz abzal. Iadrolyq qarýdan azat álem qurý Qazaqstannyń syrtqy saiasatynyń basym baǵyty bolyp qala beretinin atap ótkim keledi. Men byltyr BUU Qaýipsizdik Keńesiniń aiasynda biologiialyq qaýipsizdik jónindegi halyqaralyq agenttikti qurýdy usynyp, jahandyq kún tártibiniń taǵy bir ólshemin usyndym", - dedi Prezident.
