Almaty áýejaiy Aýǵanstandaǵy BUU qyzmetkerleri mingen ushaqty qabyldady. Bul týraly SIM habarlady.
«Aýǵanstandaǵy ishki saiasi ahýaldyń shielenisýine bailanysty Birikken Ulttar Uiymy (BUU) óziniń Aýǵanstanǵa járdem kórsetý jónindegi missiiasyn (UNAMA) jáne AIR-da akkredittelgen BUU-nyń basqa da agenttikterin Almaty qalasyna ýaqytsha ornalastyrý týraly Qazaqstanǵa ótinish bildirdi.
Qazaqstan men BUU-nyń jan-jaqty ózara is-qimyly rýhy sheńberinde jáne osy uiymnyń tolyq quqyqty múshesi retindegi mindettemeleri aiasynda Prezident Qasym-Jomart Toqaev BUU ótinishin qoldaý týraly sheshim qabyldady», - delingen QR Syrtqy ister ministrliginiń baspasóz habarlamasynda.
Aita keteiik, 18 tamyzda UNAMA qyzmetkerleri bar alǵashqy bort Almaty áýejaiyna qondy. SIM Almaty ákimdigimen, quzyretti vedomstvolar jáne qyzmettermen birlesip, olardy ornalastyrý boiynsha jedel túrde qajetti sharalardy qabyldaýda. Kelgen qyzmetkerler - halyqaralyq diplomattar, BUU pasporttary men immýnitetteriniń iegerleri.
Almatyda UNAMA jáne basqa da BUU agenttikteriniń keńselerin ornalastyrý jáne olardyń odan ári qyzmet etýi ýaqytsha, iaǵni Aýǵanstandaǵy jaǵdai turaqtalǵanǵa deiin, shamamen jarty jylǵa sozylady dep kútilýde.
Qyzmetkerlerdiń turýy, keńse men úi-jailaryn jalǵa alýy jáne t.b. barlyq shyǵystary tolyǵymen BUU-nyń biýdjetinen qarjylandyrylady.
