Aýǵanstan aýmaǵynda qazirgi ýaqytta qansha etnikalyq qazaq turyp jatyr. Bul suraqqa QR Syrtqy ister ministrliginiń resmi ókili Aibek Smadiiarov jaýap berdi, dep habarlaidy "Ult aqparat"
«Aýǵanstandaǵy etnikalyq qazaqtardyń ótinishine bailanysty memleket basshysy Qasym-Jomart Toqaev syrtqy ister ministrligine olardyń qaýipsizdigin qamtamasyz etýdi jáne qajet bolǵan jaǵdaida tarihi Otanyna qaitarý máselesi boiynsha barynsha kómek kórsetýdi tapsyrdy», - dedi Aibek Smadiiarov tilshilerge bergen suhbatynda.
Onyń aitýynsha, etnikalyq qazaqtar máselesi Qazaqstannyń Aýǵanstandaǵy elshiliginiń erekshe baqylaýynda.
«Bizde bar málimetterge sáikes, Aýǵanstan aýmaǵynda 15-ke jýyq etnikalyq qazaqtardyń otbasy turady. Naqtyraq, 200-ge jýyq etnikalyq qazaq. Keibir BAQ Aýǵanstanda birneshe myń etnikalyq qazaqtardyń turatyny týraly tekserilmegen aqparat taratty. Bul shyndyqqa sáikes kelmeidi. Osyǵan bailanysty aqparatty muqiiat qaita tekserýdi jáne qajetsiz dúrliktirmeýdi suraimyz. Biz tiisti jumys júrgizip jatyrmyz jáne Aýǵanstandaǵy qazaqtarmen turaqty bailanystamyz», - deidi ol.
Onyń aitýynsha, sońǵy kezde elshilikke ózderin "qazaqpyz" dep tanystyratyn túrli toptar jii kele bastaǵan. Biraq is júzinde eshqandai dáleli joq.
«Olardyń keibireýi qazaq tilinde sóilei almaidy. Sondai-aq, ata-babalarynyń Aýǵanstan aýmaǵyna qonys aýdarý tarihy men rý-taipalyq bailanystary týraly aita almaidy. Biz etnikalyq qazaqtardyń tarihi Otanyna oralýyna kómek kórsetý týraly ótinishterge muqiiat tekseris júrgizemiz», - deidi ministrliktiń resmi ókili.
