AQSh áskeri tikushaǵy Kabýldegi elshiligi janynda ushyp barady. 15 tamyz 2021 jyl.
Aýǵanstan ishki ister ministri Abdýl Sattar Mirzakval video úndeý joldap, Kabýldyń tranzittik úkimetke beibit jolmen beriletinin aitty, dep habarlaidy Azattyq.
Munyń aldynda qalanyń syrtqy aýdandaryna tálipterdiń kirgeni habarlandy. Qala turǵyndary tálipterdi qalanyń Qalaqan, Qarabaq jáne Pagman aýdandarynan baiqaǵan.
Oǵan deiin "Taliban" (qozǵalys Qazaqstanda terroristik dep tanylyp, oǵan tyiym salynǵan - red.) Aýǵanstannyń eń iri degen qalalarynyń bárin óz baqylaýyna alǵan. Kabýl úkimet baqylaýynda qalǵan jalǵyz qala boldy.
Biraq "Taliban" málimdeme jasap, aýǵan astanasyn "kúshpen almaitynyn" aitty.
Osydan keiin aýǵan prezidentiniń ákimshiligi halyqty abyrjymaýǵa shaqyrdy.
"Dúrlikpeńizder! Kabýl qaýipsiz!" dep jazdy aýǵan prezidenti ákimshiliginiń jetekshisi Matin Bek Twitter jelisinde.
Qazaqstan úkimeti terroristik uiym dep tanyǵan "Taliban" qalaǵa kúshpen kirýdi kózdemeitinin, beibit jolmen kirý jóninde kelissóz júrgizip jatqanyn málimdedi. Áskeri top sarbazdaryna Kabýlge kireberis beketterdi baqylaýdy tapsyrǵanyn aitty.
"Taliban" ókilderi beibit tranzit máselesin talqylaý úshin prezident saraiyna jol tartty dep habarlady Associated Press agenttigi úkimettegi derekkózine siltei otyryp.
15 tamyz kúni tańerteń tálipter shyǵystaǵy bas qala Jalalabadty óz baqylaýyna alǵan. Odan bir táýlikke jeter-jetpes ýaqyt buryn "Taliban" qolyna eldiń soltústigindegi iri qala Mazari-Sharif ótken. Bul eki qala da tálipterge soǵyssyz berildi.
