Qazirgi ýaqytta Nur-Sultan áýejaiynan ushyp shyǵatyn 16 jáne ushyp keletin 18 reis ýaqytynan keshigip jatyr. Bul jaiynda Azamattyq aviatsiia komitetiniń Facebook paraqshasynda jariialanǵan aqparatta aitylǵan, dep habarlaidy "Ult aqparat".
«Aýa-raiynyń qolaisyzdyǵyna, atap aitqanda qatty qarly boranǵa, ushý qaýipsizdigi úshin áýe kemelerin muzǵa qarsy suiyqtyqpen óńdeý júrgizýdiń múmkin emestigine bailanysty, Nursultan Nazarbaev halyqaralyq áýejaiyna kelip-ketetin ushaq reisteri keshigip jatyr. Qazirgi ýaqytta 16 reis ushýǵa keshigýde. Olar: «Eir Astana» áýe kompaniiasynyń 10 reisi (Shymkent-2 reis, Atyraý, Óskemen, Almaty - 2 reis, Aqtóbe - 2 reis, Dýbai, Novosibirsk) jáne «SCAT» áýekompaniiasynyń eki reisi (Almaty, Aqtaý). Sonymen qatar, Nur-Sultan-Ystanbul baǵyty boiynsha Turkish Airlines áýe kompaniiasynyń reisi, Nur-Sultan-Dýbai baǵyty boiynsha Flaidýbai áýe kompaniiasynyń, Nur-Sultan-Frankfýrt baǵyty boiynsha Liýftganza áýe kompaniiasynyń, Nur-Sultan-Máskeý baǵyty boiynsha Aeroflot áýe kompaniiasynyń reisi. Ushyp kelýge 18 reis keshigýde. Olar: «Eir Astana» áýe kompaniiasynyń 11 reisi (Almaty – 3 reis, Qyzylorda, Shymkent - 2 reis, Oral, Aqtóbe - 2 reis, Óskemen, Novosibir), «SCAT» áýe kompaniiasynyń 4 reisi (Almaty, Aqtaý, Atyraý, Máskeý), Qazaq Air áýe kompaniiasynyń 2 reisi (Jezqazǵan, Óskemen) jáne Nur-Sultan-Máskeý baǵyty boiynsha FlyArystan áýe kompaniiasynyń reisi», - delingen komitet aqparatynda.
Aita keterligi, «Qazaqstan Respýblikasynyń áýe keńistigin paidalaný jáne aviatsiialyq qyzmet týraly» Qazaqstan Respýblikasynyń 2010 jylǵy 15 shildedegi Zańynyń 86-babyna sáikes, reis tasymaldaýshynyń kinásinen nemese keiinge qaldyrylǵannan keiin reis toqtatylǵan nemese keshiktirilgen kezde, áýe kemesiniń kesh kelýine nemese tasymaldaý marshrýtynyń ózgerýine bailanysty reis toqtatylady.
Ushý jáne aralyq pýnktterdegi jolaýshylar úshin mynadai qyzmetter kórsetiledi:
1) jeti jasqa deiingi balasy bar jolaýshyǵa ana men bala úshin bólme (eger bar bolsa) berý;
2) reistiń ushýyn eki saǵattan artyq kútip turǵan kezde bes minýttan aspaityn eki telefon qońyraýy nemese elektrondyq poshta arqyly eki habarlama;
3) reistiń ushýyn eki saǵattan artyq kútý kezinde alkogolsiz sýsyndarmen qamtamasyz etý;
4) reistiń ushýyn tórt saǵattan artyq kútken kezde jáne odan ári ystyq tamaqpen qamtamasyz etý:
- ár alty saǵat saiyn - kúndiz;
- ár segiz saǵat saiyn - túnde;
5) tasymaldaýshy usynǵan qonaqúide turý, reistiń segiz saǵattan astam ýaqytty kútý kezinde - kúndiz jáne alty saǵattan artyq - túnde;
6) tasymaldaýshy usynǵan kólikpen áýejaidan qonaqúige jáne keri qaitý, eger qonaq úi qosymsha aqysyz usynylsa.
Eger reis tasymaldaýshynyń kinásinen on saǵattan astam ýaqytqa toqtatylsa nemese keshiktirilse, tasymaldaýshy jolaýshynyń tańdaýy boiynsha:
1) osy baptyń 1-tarmaǵyna sáikes qyzmet kórsete otyryp, jolaýshy bilette kórsetilgen baǵytqa jaqyn reispen tasymaldaýdy qamtamasyz etedi;
2) jolaýshyǵa bilettiń tolyq qunyn qaitarady.
Eger kórsetilgen qyzmetter kórsetilmese, jolaýshylarǵa «Ákimshilik quqyq buzýshylyq týraly» 2014 jylǵy 5 shildedegi Qazaqstan Respýblikasy Kodeksiniń 567-babyna sáikes áýe kompaniialardy ákimshilik jaýapkershilikke tartý úshin ýákiletti organǵa habarlasý usynylady.
«Bul rette meteojaǵdailar boiynsha áýe reisterdi keshiktirý nemese toqtatý áýe tasymaldaýshynyń kinási bolyp tabylmaidy. Aýa-raiy boljamyna sáikes, el aýmaǵynda qolaisyz meteojaǵdailar saqtalady. Osyǵan bailanysty jolaýshylarǵa reisterdiń jaǵdaiyn call-ortalyqtar men áýe kompaniialardyń resmi saittarynda aldyn-ala bilýge keńes beriledi. «Eir Astana» áýe kompaniiasynyń bailanys ortalyqtary: Almaty q. +7 7272 444477, Astana q. +7 7172 584477, uialy telefon: +7 702 702 4477. SCAT áýe kompaniiasynyń bailanys ortalyǵy +7 7252 998880. Barlyq jolaýshylardan aýa-raiynyń qolaisyzdyǵyna bailanysty áýe reisteriniń keshigýine túsinistikpen qaraýdy suraimyz»,- delingen taratylǵan aqparatta.
Eske salsaq, elorda áýejaiynda boranǵa bailanysty 14 reis keiinge qaldyrylǵany týraly buǵan deiin habarlaǵan bolatynbyz .
