Foto: Dýman Qurmanǵaliev
18 tamyzda Ulttyq qaýipsizdik júiesi negizgi komponentteriniń biri - QR Qarýly kúshteri Áýe qorǵanysy kúshteriniń qurylǵanyna 27 jyl tolyp otyr, dep habarlaidy Ult.kz.
Búginde Qarýly kúshterdiń bul túri Qazaqstan áskeriniń qýatty, joǵary tehnologiialyq jáne utqyr quramdas bóligine ainalǵan.
Olardyń quramyna Áýe shabýylyna qarsy qorǵanys áskerleri men Áskeri-áýe kúshteri kiredi. Olar áýe shebin senimdi qorǵaýdy, strategiialyq mańyzdy memlekettik, ákimshilik jáne áskeri obektilerdi búrkemeleýdi qamtamasyz etedi. Qarýly kúshterdiń basqa túrleri men ásker tekterin aviatsiialyq qoldaý mindetterin oryndaidy.
Mamandardy daiarlaý beiindi áskeri oqý oryndarynda júrgiziledi. Aqtóbedegi Áýe qorǵanysy kúshteriniń áskeri institýty ushý jáne injenerlik-tehnikalyq quramnyń mamandaryn, al Almaty qalasyndaǵy Radioelektronika jáne bailanys áskeri-injenerlik institýty Áýe shabýylyna qarsy qorǵanys jáne bailanys áskerleri úshin injenerlik kadrlar daiarlaidy.
Áskeri-áýe kúshterinde aerodinamikalyq, ushý jáne jaýyngerlik sipattamalary boiynsha álemdegi eń jaqsy dep tanylǵan zamanaýi jaýyngerlik, áskeri-kóliktik, jattyǵý ushaqtary men tikushaqtar bar. Ótken jyly aviatsiialyq park 37 tonnaǵa deiin nemese 100-den astam áskeri qyzmetshini uzaq qashyqtyqqa tasymaldaýǵa qabiletti kópfýnktsionaldy A400M áskeri-kóliktik ushaǵymen tolyqty. Áýe kemesin paidalanǵan jarty jyl ishinde ekipaj jeke quramdy tasymaldaýda birqatar mindetterdi oryndady. Onyń ishinde Golan jotalaryndaǵy bitimgerlerdi rotatsiialaý, qazaqstandyq komandalardyń Birikken Arab Ámirlikterine UAE SWAT Challenge-2025 halyqaralyq jarystaryna aparyp kelý, "Aibyn-2025" halyqaralyq áskeri-patriottyq jastar jiynyn kólikpen qamtamasyz etý bar.
Áýe qorǵanysy kúshterin damytýdyń mańyzdy basymdyǵy avtomattandyrylǵan basqarý júiesin engizý bolyp otyr. Bul áýe qaýpi jaǵdaiynda barlyq bólimshelerdiń tiimdi ózara is-qimylyn qamtamasyz etýge, onyń ishinde jedel aqparat jinaýdan bastap jaýyngerlik is-qimyldardy úilestirýge jáne ushýdy basqarýǵa múmkindik beredi.
Áýe qorǵanysy kúshterinde jaýyngerlik daǵdylardy arttyrý, ushý quramyn kúrdeli mindetterdi oryndaýǵa daiyndaý, joǵary pilotaj daǵdylaryn igerý boiynsha júieli jumys júrgizilýde.
Áskeri ushqyshtar árqashan beibit turǵyndarǵa kómekke kelýge daiyn. Armiialyq aviatsiia ekipajdary adamdardy evakýatsiialaýǵa, 2024 jylǵy sý tasqyny kezinde azyq-túlik pen gýmanitarlyq júkterdi jetkizýge, Abai oblysyndaǵy orman órtin sóndirýge jáne jedel den qoiýdy qajet etetin basqa da mindetterge tartyldy.
