Astana kúnine orai, «Birgemiz» aktsiiasy aiasynda «Nur Otan» partiiasynyń oblystyq partiia filialynda Alakól aýdandyq aýrýhanasyna eki jedel-járdem kóliginiń kilti tabys etildi. Sharaǵa oblys ákiminiń orynbasary Batyrjan Baijumanov qatysty.
Saltanatty sharada sóz alǵan oblystyq partiia filialy tóraǵasynyń birinshi orynbasary Janbolat Jórgenbaev aktsiia barysynda atqarylyp jatqan sharalardy atap ótti.
– «Saýsaq birikpei, ine ilikpeidi» dep dana halqymyz aitqandai, biz kez-kelgen sátte tatýlyǵymyzdy tanytyp, «bir jaǵadan bas, bir jeńnen qol shyǵaryp», barlyq is-sharanyń basy-qasynan tabyla bilýimiz kerek. Búgingi tańda kóptegen elmen qatar bizdiń memleketimiz de asa jaýapty syn saǵatty bastan ótkerýde. Elimizde tótenshe jaǵdaidyń oryn alýyna bailanysty Elbasy, «Nur Otan» partiiasynyń tóraǵasy Nursultan Nazarbaevtyń bastamasymen «Biz birgemiz» aktsiiasy bastaý alǵan bolatyn. Respýblikalyq aktsiia aiasynda 24813 adam 257 mln. teńgeniń azyq-túlik, jeke gigienealyq zattarmen, antiseptikalyq quraldar jáne meditsinalyq maskalarmen qamtamasyz etildi, – dedi.
Pandemiia kezinde «nurotandyqtardyń» aýrýhanalarǵa da kórsetip jatqan kómegi az emes. Atap aitsaq, partiia múshesi Viktor Sychev Taldyqorǵan qalasyndaǵy oblystyq jedel járdem stansysyna reanimobil, kásipker Marat Sergebaev Qapshaǵai qalalyq aýrýhanasyna «Volga» avtokóligin syiǵa tartty. Respýblikalyq «Birgemiz» qorynan oblysymyzdaǵy 40193 muqtaj janǵa 50 myń teńgeden qarjylai kómek kórsetildi. «Birgemiz Jetisý» qory esebinen karantindik shara engizilgen aýdan-qala turǵyndaryna meditsinalyq qural-jabdyqtar men azyq-túlik berildi.
Shara barysynda oblys ákiminiń orynbasary Batyrjan Baijumanov pen oblystyq partiia filialy tóraǵasynyń birinshi orynbasary Janbolat Jórgenbaev Jedel-járdem kólikteriniń kiltin Alakól aýdandyq aýrýhanasy direktorynyń orynbasary Qurmet Abzalulyna saltanatty túrde tabys etti. Endi júitkigen jańa kólikter aýdandaǵy aýyrǵan jandarǵa kidirissiz kómekke keleri anyq. Sondai-aq, shaǵyn jiynda ár salada qyzmet etip júrgen, partiia qataryna jańadan qosylǵan belsendi jastarǵa partbilet tabys etildi. Sharapatty shara qanymyzǵa sińgen qaiyrymdylyq qasiettiń qashanda biik turaryn dáleldei tústi.
Alma Esenbaeva
