Ninety One tobynyń múshesi «Jas Otan» Ortalyq keńesi músheligine úmitker atandy, dep habarlaidy QazAqparat.
Jastar uiymynyń habarlaýynsha, 18 qańtardan bastap «Nur Otan» partiiasynyń «Jas Otan» jastar qanaty Ortalyq keńes músheleriniń onlain sailaýyn jariialaǵan. Keńeske elimizdiń barlyq aimaqtarynan 16 kóshbasshy 4 jylǵa taǵaiyndalady. Sailaýda usynylǵan úmitkerlerdiń biri - Dýlat Muhametqali (ZaQ) «Ninety One» tobynyń múshesi.
«Ninety One» toby - ózindik stilimen qazaq estradasynda rezonans týdyrǵan 5 ánshiden turatyn qazaqstandyq boiz-bend. Toptyń ataýy egemendik alǵan 1991 jylmen bailanysty.
Top 2015 jyly «Aiyptama» ánimen alǵash sahnaǵa shyqsa, osy ánge túsirilgen beinebaian 20 apta boiy mýzykalyq arnalardyń úzdikter tiziminde boldy. Al keiin top «Aiyptama» atty debiýtti mini-albomyn tanystyrdy. Jarty jyldan soń «Qaitadan» ánine túsirilgen jańa beinebaian shyqty.
Top óner kórsetken úsh jylda «Ninety one» avtobiografiialyq filmin jáne «Qaǵaz keme» serialyn túsirip úlgerdi.
«Sailaýǵa keletin bolsaq, Dýlat Muhametqali Ortalyq keńes músheliginde bolýǵa niet bildirýi - «Jas Otan» men jalpy jastar saiasatyn kúrdeli ózgerister kútip turǵanynyń belgisi. Odan ózge, sailaýǵa úmitkerler qatarynda jas kásipkerler men ózge de mamandyq ieleri bar. Ortalyq keńes múshelerin onlain daýys berý jolymen tańdaýda uiymnyń maqsaty ár aimaqtan daryndy, qoǵamda ózgeris engizýge qabiletti jastardy tańdaý bolsa, uiym óz degenine jetýge jaqyn dese bolady. Aitar oiy men naqty usynystary bar jastarǵa - «Jas Otan» árdaiym ashyq», - delingen habarlamada.
«Jas Otan» joǵary ókiletti organy - Ortalyq keńesiniń sailaýy alǵash ret ótkizilip otyr. Sailaý eki kezeńnen turady. 1-kezeńde úmitkerler tirkeýden ótedi. Al 2-kezeńde úmitkerler 9 aqpanǵa deiin #JasOtanSailau heshtegimen Instagram paraqshalarynda jariialaǵan video joldaýyna 5 000 laik jinaýy qajet. Al áleýmettik jeli qoldanbaityn úmitkerler qol jinaý arqyly 500 adamnyń qoldaýyna ie bolýy kerek. Sondai-aq, 11-16 aqpan aralyǵynda jetkilikti qoldaý jinaǵan úmitkerlerge Telegram platformasynda onlain daýys berý ótedi. Daýys berýge «Jas Otan» músheleri qatysa alady. 17 aqpan kúni «Jas Otan» Ortalyq keńesiniń 16 múshesi belgili bolady.
