7-8 qyrkúiek kúnderi Oral qalasynda atyraýlyq úkimettik emes uiymdary ókilderi arasynda «AkZhaiykcamp19» eki kúndik seminar-treningi ótti.
Seminar-treningtiń maqsaty - túrli baǵytta belsendi áreket etetin úkimettik emes uiymdardyń áleýmettik baǵyttaǵy jumystar men qarjylyq saýattylyqtaryn arttyrý, tyń ideialarynyń júzege asýyna járdemdesý, fandraizing (jobaǵa qarjy kózderin tartý) baǵyty boiynsha tájiribe almasý.
Bul sharaǵa qatysý úshin atyraýlyq úkimet emes uiym ókilderi saitqa ótinim qaldyrdy. 75 ÚEU ótinish tapsyryp, konkýrs erejesine sáikes komissiialyq irikteýden ótken 40 úkimettik emes uiym ókili osy sharaǵa qatysty.
Atyraý qalasynan Oral qalasyna jetý úshin qatysýshylar arnaiy avtobýspen bardy. Uiymdastyrýshylar Oral qalasyna jetken soń qatysýshylardyń tabiǵat aiasynda áserli tanysý keshin uiymdastyrdy.
Azamattyq ortalyqtyń direktory Áigerim Dosqalieva sharanyń maqsaty týraly aityp ótti.
Áigerim Dosqalieva, Azamattyq ortalyqtyń direktory:
Sharanyń basty maqsaty – túrli baǵytta belsendi áreket etetin úkimettik emes uiymdardyń áleýmettik baǵyttaǵy jumystar men qarjylyq saýattylyqtaryn arttyrý. Bul is-sharaǵa qatysýshylar konkýrstyq negizde iriktelip alyndy. Qatysýǵa 70-ten astam ÚEU ótinish bildirip, sodan talaptardy tolyq oryndaǵan 40 uiym kúzgi lagerge joldama aldy. Iaǵni, bizde arnaiy 10 suraqtan quralǵan saýalnamany toltyrý kerek boldy. Onda kúzgi lagerge qatysý maqsaty, qandai jobalyq ideiasy bar, ózińniń ÚEU-dy bes jyldan soń qalai elestetesiń degen suraqtar boldy. Kelgen saýalnamalarǵa bizdiń áriptester jáne Atyraý oblysy ishki saiasat basqarmasy basshylyǵy irikteý jasap, baǵalaý júrgizdi.
Alǵashqy kúni qatysýshylar sharanyń ashylýyna qatysty. Budan soń Novosibir qalasyndaǵy «Solnechnyi gorod» balalarǵa arnalǵan qaiyrymdylyq qorynyń fandraizeri, 285 mln rýbl kóleminde qorǵa qarjy tartqan Stýla Zemfira men «Dobryi gorod – Peterbýrg» qaiyrymdylyq qorynyń úilestirýshisi «Jańadan bastaýshylarǵa arnalǵan fandraizing» jáne «ÚEU qyzmetine qarajat izdeý: syrtqy jáne ishki resýrstar» taqyrybynda seminar-trening ótkizdi. Túrli oiyndar arqyly kórsetilgen treningte ÚEU ókilderi óz salalaryna bailanysty túrli suraqqa jaýap aldy.
Qatysýshylarǵa seminar-trening ótkizgen trener Iana Zýbko shara týraly óz pikirin bildirdi.
Iana ZÝBKO, «Dobryi gorod – Peterbýrg» QQ úilestirýshisi:
Seminar-treningke qatysýshylar sabaqty jaqsy qabyldady. Bul taqyrypta aitatyn aqparat óte kóp. Bir kúnde barlyǵyn qamtý múmkin emes. Sol sebepti de bir kúnde kóp aqparatty jetkizý jáne qabyldaý qiyn bolýy múmkin. Biraq, qiyndyq bolmasa úlken jetistikke jetý de damý da bolmaidy dep oilaimyn.
Seminar-treningten soń qatysýshylar keshkisin komandalyq oiyndar oinap, sońy kóńildi keshke ulasty.
Sharanyń ekinshi kúni atyraýlyq ÚEU ókilderi Ulybritaniiadaǵy Fandraizing institýtynyń múshesi, qazaqstandyq fandraizer Indira Shahtyń «Jobalyq ótinim degen ne? Jobanyń nátijesi men tiimdiligi qandai?» taqyrybynda seminar-treningine qatysty. Árbir qatysýshy óziniń qazirgi bastaǵan nemese oiynda júrgen jobalyq ideialaryn trenermen aqyldasa otyryp, maqsaty men nátijesin birge talqylady. Komandaǵa bólingen qatysýshylar ózara jarysa otyryp, jaqsy jobalyq ótinimniń tiimdiligi men maqsatyn túsinip shyqty.
Eki kúndik sharadan soń qatysýshylar óziniń áserimen bólisti.
Meiirim Erdáýlet, «Talshyn» qoǵamdyq qorynyń jetekshisi:
Jaqsy demalys pen keremet lager barlyǵyn birge uiymdastyrǵan Azamattyq ortalyqqa kóp raqmet! 40 uiym men bilgir trenerlerdiń tálimi, qonaqjailylyq pen jyly qabyldaý, jańa ideialar men kókeide júrgen maqsattardy júzege asyrýǵa degen úlken múmkindik, komandalyq uiymshyldyq jáne igi istiń qashanda basynda júrýdiń qyr-syryn sanamyzǵa quiǵan lager úshin raqmet saǵan, Azamattyq ortalyq!
Aqylbek Muhanov, «Igi iske bastama» qoǵamdyq birlestiginiń jetekshisi:
Áriptesterime kóp rahmet aitamyn! Osyndai paidaly treningter kóp bolsyn! Bizdiń baǵytymyz ár qily bolǵanymen, maqsatymyz – bir. Bir-birimizdi árkez qolpashtap júre bereiik!
Elvira Aralova, «Samǵa, júregim» qoǵamdyq qorynyń jetekshisi:
Kóńildi atmosfera, jaily ortada bilimimzdi arttyrǵan keremet shara boldy. Qazaqta «bilgenim – bir toǵyz, bilmegenim – toqsan toǵyz» degen sóz ras. Jobany qalai jazý kerek, qarjyny qalai tartýǵa bolady jáne t.b. oiymdaǵy kóptegen suraqqa jaýap aldym. Qatysýshylar da ózderiniń tájiribelerimen bólisti. Bárimiz bir salada júrgennen soń bul paidasyn tigizedi dep oilaimyn. "Aqjaiyq CAMP" atty lager uiymdastyrǵan azamattyq ortalyqqa úlken alǵys bildiremin. Osyndai sharalar kóp bolyp, Atyraýlyq ÚEU-dyń belsendiligi arta bergei!
Qaidarbek Qurmashev, «Aqjol Mahambet» múgedekter qoǵamdyq birlestigi:
Bilý, úirený qai jasta da uiat emes dep oilaimyn. Al mynadai kóńildi ortamen bilimińdi arttyrý tipten keremet! Biz bir dúniege jan-jaqty kózqaraspen qaraýymyz kerek. Áli de úirenerimiz kóp. Ózim árkez izdeniste júrgendi jaqsy kóremin. Osyndai sharalar jii uiymdastyryla berse, qatysýdan qashpas edim. Men úshin qajetti dúnieler aityldy. Azamattyq ortalyq ujymyna alǵysym sheksiz.
Seminar-trening bitken soń Azamattyq ortalyq ujymy qatysýshylardy Oral qalasynyń kórikti jerlerine aralatty. Shara sońynda qorytyndy kesh uiymdastyrylyp, árbir qatysýshyǵa Azamattyq ortalyqtyń direktory Ámina Járdemqyzy sertifikat tabystady.
Aita keteiik, fandraizing – óz baǵdarlamalaryn iske asyrý jáne maqsattaryna qol jetkizý úshin qajetti resýrstar alýǵa baǵyttalǵan qyzmet.
