Foto: Shutterstock
Atyraý oblysynda bir otbasynyń iz-tússiz joǵalýyna qatysty is qoǵamda úlken rezonans týǵyzdy. Osy jaǵdaidan keiin áleýmettik jelilerde belgisiz bir «hakerdiń» joǵalǵan adamdardy óz betinshe anyqtaǵany týraly aqparat tarady. Alaida politsiia bul málimetterdi resmi túrde joqqa shyǵardy, dep habarlaidy Ult.kz.
Atyraý oblystyq politsiia departamentiniń habarlaýynsha, atalǵan tulǵa eshqandai táýelsiz tehnikalyq taldaý júrgizbegen jáne jańa derekterge qol jetkizbegen. Áleýmettik jelilerde jariialanǵan málimetter quqyq qorǵaý organdarynyń zańdy jedel-izdestirý sharalary aiasynda alynǵan aqparatpen tolyq sáikes keledi jáne ol resmi eskertý jariialanǵannan keiin ǵana taraǵan.
Politsiia barlyq derekterdiń telekommýnikatsiia operatorlary men ýákiletti uiymdardyń qatysýymen, zań talaptaryn qatań saqtai otyryp alynǵanyn atap ótti. Sonymen qatar, qysym kórsetý nemese qorqytý týraly aitylǵan habarlamalardyń shyndyqqa janaspaityny málimdeldi.
Quqyq qorǵaý organdary azamattardy tek resmi aqparat kózderine senýge shaqyryp, jalǵan aqparat taratýdyń zańmen jazalanatynyn, onyń ishinde qylmystyq jaýapkershilik qarastyrylǵanyn eskertti.
Sondai-aq politsiia áleýmettik jelilerde aty atalǵan tulǵaǵa qatysty buǵan deiin alaiaqtyq faktileri boiynsha tórt qylmystyq is qozǵalǵanyn habarlady. Qazirgi tańda ol belgilengen zańdy tártippen izdeýge jariialanǵan, tergeý amaldary jalǵasyp jatyr.
Eske sala keteiik, Atyraý oblysynyń Jangeldi aýylynda bir otbasynyń birneshe múshesi joǵalyp ketken bolatyn. Tergeý barysynda 1959 jyly týǵan erli-zaiypty Maksot Qarabalin men Nasip Óteshqalievanyń máiitteri tabylyp, qylmystyq is «adam óltirý» baby boiynsha tirkeldi. Politsiia kúdiktiler anyqtalǵanyn, olardy ustaý sharalary júrgizilip jatqanyn habarlady. Al taǵy eki adamnyń taǵdyry ázirge belgisiz kúiinde qalyp otyr.
