Qazaqstandaǵy saiasi qýǵyn-súrgin qurbandaryn eske alý úshin Atyraý oblysynyń ákimi Nurlan Noǵaev qaladaǵy memorialdyq taqtaǵa baryp, gúsh shoqtaryn qoiyp, taǵzym etti, dep habarlaidy "Ult aqparat" oblys ákiminiń baspasóz qyzmetine silteme jasap.
Bozdaqtardy aza tutýǵa oblystyq ardagerler keńesiniń, Qazaqstan halqy assambleiasynyń músheleri, mekeme, kásiporyn jáne eńbek ujymdarynyń qyzmetkerleri jinaldy. Olardyń qatarynda saiasi qýǵyn-súrginge ushyraǵan azamattardyń urpaqtary da boldy.
Aita ketelik, qazir Atyraý oblysynda saiasi qýǵynnyń zardabyn shekken 7 myńnan astam adam tirkelgen. Qazir aimaqta jazyqsyz japa shekken 10 adamnyń urpaǵy ómir súredi. Búgingi sharaǵa zulmat jyldary qiianat kórgen úsh azamattyń balalary men nemere-shóbereleri keldi.
Jiynda sóilegen oblys ákimi Nurlan Noǵaev rýhani jańǵyrý Alashtyń arystaryn ardaqtaýda qasterli isterin qurmetteýde basty qundylyq bolýy qajet dedi.
“Bolashaqqa baǵdar berip, qoǵamnyń órkeniet kóshine ilesip, damýyna yqpal jasaityn kókiregi oiaý, kózi ashyq ziialylardy aramyzdan alyp ketip atyp tastady, itjekkenge aidady. Júzmyńdaǵan adam elimizdiń jarqyn bolashaǵy jolynda qurban boldy. Sol jyldary kóptegen kórnekti qairatkerler jáne ózge ulttyń ókilderi eriksiz Qazaqstan jerine aýyp keldi. Qushaǵy ashyq keńpeiil halqymyz olardy túrine, tiline, dinine qaramai týysyndai baýyryna basty. Azattyq jolynda qurban bolǵan azamattardy eske saqtai otyryp, árqaisymyzdy el damýyna aianbai qoldan kelgenshe qyzmet atqarýǵa shaqyramyn”, – dedi oblys ákimi.
Aita ketelik, Qazaqstan boiynsha 103 myńǵa jýyq azamat saiasi qýǵyndalandy. Olardyń 25 myńy atý jazasyna kesilgen. Sol kezde Qazaqstanǵa jer aýyp kelgen 1,5 million ózge ult ókili atamekenimizde pana taýyp, órken jaidy.
1993 jylǵy 14 sáýirde Qazaqstan Respýblikasynyń «Jappai saiasi qýǵyn-súrgin qurbandaryn aqtaý týraly» zańy qabyldandy. Nursultan Ábishuly 1997 jyldy saiasi qýǵyn-súrgin qurbandaryn eske alý jyly dep bekitip, 31 mamyr olardy eske alý kúni bolyp jariialandy
