4 qazanda Atyraý qalasynyń ákimshilik soty qaladaǵy jekemenshik "Qazaq ulttyq qyzdar mektebine" litsenziiasyz jumys istedi dep 53 603 teńge kóleminde aiyppul salý týraly qaýly shyǵardy, dep habarlaidy Azattyq.
9 qyrkúiekte "Adyrna" saity "Atyraýda jańadan ashylǵan "Qazaq ulttyq qyzdar mektebi" salafizm baǵytynda jáne qyzdardyń betin tumshalaýǵa itermelep jatyr" degen sarynda maqala jariialaǵan.
Osy maqaladan keiin Atyraý oblysy bilim sapasyn qamtamasyz etý departamenti mektepke tekseris júrgizip, jekemenshik bilim berý ornynyń litsenziiasyz jumys istep jatqanyn anyqtaǵan.
13 qyrkúiekte Atyraý oblysy bilim sapasyn qamtamasyz etý departamenti basshysynyń mindetin atqarýshy Berdibek Taishev mektep ústinen Ákimshilik kodekstiń "Tiisti tirkeýsiz kásipkerlik ne ózge de qyzmetpen ainalysý" baby boiynsha hattama toltyryp, sotqa joldaǵan edi.
14 qyrkúiekte qyzdarǵa arnalǵan jekemenshik mekteptiń direktory Jumaziia Jolmuhanova Azattyq tilshisine "mektepte salafizm ideologiiasynyń úgit-nasihaty júredi degen aqparat jalǵan jáne munda oqýshylar memlekettik bilim berý standarttarymen oqidy" degen.
Sot protsesi 20 qyrkúiekte bastalǵan edi. Sottyń bapasóz qyzmeti mekteptiń biylǵy oqý jylyna 101 oqýshyny (barlyǵy jeti synyp) qabyldap, tirkeýsiz jáne ruqsatsyz bilim berýmen ainalysqanyn habarlady.
Al Taishev Azattyq tilshisiniń "mektepke tekseris kezinde salafizm belgileri baiqaldy ma?" degen saýalyna "biz bul boiynsha maman emespiz, sondyqtan ondai belgi bar ne joq dep aita almaimyz. Óz quziretimiz sheginde bilim salasyndaǵy normativterge sáikestigin ǵana tekseremiz" dep jaýap berdi.
Mektep direktory Jumaziia Jolmuhanova sot qaýlysyna qatysty ázirge eshteńe aita almaitynyn, quryltaishylarymen keńesetinin jetkizdi. Onyń sózinshe, mektep alty aidan soń litsenziia alady, oǵan ótinish berip qoiǵan. Sot qaýlysyna sai, mektep aiyppuldy on kún ishinde tóleýi tiis.
Mektep jumysyn jalǵastyryp jatyr.
