Onyń aitýynsha, marihýana tárizdes shóptiń temeki ishine salynǵan 2 danasyn kósheden taýyp alyp ony, joldastaryna kórsetken. Onyń ishinde jaqyn dosy da bolǵan. Dosy esirtkiniń bir danasyn surap alyp, ony politseilerge tapsyryp, nege ekeni belgisiz esirtkini dosynan satyp alǵanyn aitqan.
"Osynyń bárin aldyn ala uiymdastyrǵanyn keiin túsindim, sebebi men oǵan esirtki taýyp alǵanymdy aitqan edim. Bul jerde dosym menen bir danasyn alyp, al politseilerge 2 dana qylyp tapsyrǵan. Ony keiin maǵan baiqatpai túsirgen beinejazbasynan da kórdik. Nege ekeni belgisiz, dosym "eki danasyn satyp aldym" dep, maǵan naqaq jala jaýypty. Bul jerde joldasymnyń buryn esirtkimen ustalǵanyn biletin politseiler ony maǵan ádeii jibergen dep oilaimyn.
Ol meniń bala kúngi dosym edi, ózi kirgen las iske meni de qatysty qylyp shyǵarady degen oi úsh uiyqtasam da túsime kirmepti. Dosymnyń satqyndyǵy jazyqsyz temir torǵa qamalyp, tar qapas túrmeni kórýime sebep boldy, onda kinásiz otyrýdyń ózi densaýlyǵyma áser etip, kúizeliske ushyradym", - deidi ol.
Atyraý oblysynyń advokattar alqasynyń múshesi Jandos Bisenov qorǵaýyndaǵy adamnyń bul iske eshqandai qatysy joǵyn aitady.
"Qylmystyq ispen tanysqanda, qorǵaýymdaǵy azamattyń jazyqsyz ekenin anyq baiqadym. Qai nárseni bolmasyn saýdalaý úshin satý men satyp alý rásimi, iaǵni, belgili bir taýardyń baǵasy, satyp alýshy men satýshynyń talaptary bolady. Al bul jerde "esirtki saýdasy boldy" dep naqty aitý úshin ekeýara mámile bolǵany jaily aqparat qajet. Mundai málimetter joq", - deidi advokat.
Advokat qalalyq sotqa birneshe ótinish bergen, biraq belgisiz sebeptermen ol da qanaǵattandyrylmaǵan. Onyń sózinshe, sottyń alǵashqy otyrysynda kinási dáleldenbese de, oǵan 5 jyl bas bostandyǵynan aiyrý úkimi kesilgen. Sóitip, apelliatsiialyq shaǵym bergen. Alaida apelliatsiialyq satyda da sot úkimi ózgerissiz qalǵan.
"Joǵary sot isti tolyq qarap, qorǵaýymdaǵy azamattyń osy qylmysqa esh qatysy joq ekenin, budan bólek QR protsessýaldyq qodeksiniń talaptary buzylǵanyn anyqtap, kassatsiialyq shaǵymda ótinishimdi qanaǵattandyrdy. Qylmystyq protsessýaldyq kodekstiń 297 babynyń 1-bóliminde kózdelgen qylmys bolmaǵan, budan bólek zań talaptary buzylǵan. Osyǵan orai is toqtatylyp, ol jazadan bosatyldy", - deidi advokat.
Tolyqtai aqtalyp shyqqan azamat Joǵary sot qaýlysymen jazadan bosap, búginde qyzmetine qaita ornalasqan. Jazyqsyz aiyp arqalaǵan ol aldaǵy maqsaty otbasyly bolyp, jalǵyz anasynyń úmitin aqtaý ekenin aitady.
