Atyraýda mektep-gimnaziiadaǵy sabaqtyń onlain formatqa aýystyrylýyna bailanysty túsinik berildi, dep habarlaidy QazAqparat.
Atyraý qalasyndaǵy №30 mektep-gimnaziiada sabaqtyń onlain formatta ótýine shatyrdaǵy aqaý sebep bolǵan.
«Bul mektep-gimnaziia 2002 jyly paidalanýǵa berilgen. Oqý ornynyń tehnikalyq jaǵdaiyn tekserý úshin «Q-Ekspert» JShS-men kelisimshart jasaldy. Atalǵan seriktestiktiń bergen qorytyndysyna sáikes, mekteptiń shatyrynda kúrdeli jóndeýdi qajet etetin aqaýlar bar. Qazir oqý ornynda «Armstrong» qaptama tóbesi qulap jatyr. Biraq, bul gips blogy emes. Osy jaǵdaidy eskere otyryp, tehnikalyq qorytyndy negizinde jobalyq-smetalyq qujattama daiyndalady. Osyǵan sáikes shatyrǵa kúrdeli jóndeý júrgizý josparlanyp otyr» - dep habarlady Atyraý qalalyq bilim bóliminen.
Sondai-aq, bul jaǵdaidyń oqý protsesine eshqandai áseri bolmaityny, erteń oqýshylardyń ádettegi oqý formatyna kóshetini naqtylanyp jatyr.
