Atyraýlyq politseiler sýǵa batqan jasóspirimderge alǵash bolyp kómekke kelgen batyr bala Dinmuhammedti marapattady, - dep habarlaidy Polisia.kz.
Ótken demalys kúni sýǵa batqan jasóspirimderge alǵash bolyp kómekke kelgen Dinmuhammedtiń batyl áreketi kópshilikti tánti etken bolatyn. 8 jasta bolsa da ózinen úlken balalarǵa kómekke kelgen Dinmuhammed Jańbyrbai Atyraý qalasyndaǵy №3 mekteptiń 3-synyp oqýshysyn búgin Atyraý oblysy Politsiia departamentiniń Jergilikti politsiia qyzmeti basqarmasynyń bastyǵy Erlan Biǵambaev arnaiy baryp departament bastyǵynyń alǵys hatymen marapattady.
"Óz eliniń er-azamaty óz eliniń patrioty bolý kerek. Jigit jeti jasynan tanylady deidi. Dinmuhammedtiń qoryqpai jasaǵan qadamy basqa balalardyń aman qalýyna septigin tigizdi. Jaraisyń, osyndai jigittiń ósip kele jatqany maqtanysh. Sendei ul ósirip otyrǵan ata-anańa raqmet! Árdaiym qatarlastaryńa úlgi bol. Seniń batyrlyǵyńdy elimizdiń barlyq óńiri, tipti kórshiles elder kórip tańǵalyp jatyr. Atyraýda osyndai batyr bala bar eken degen sózdiń ózi bizdi marqaityp otyr", - dedi Erlan Biǵambaev.
Dinmuhammed otbasynyń ortanshy perzenti, otbasynda ápkesi jáne inisi bar. Ata-anasy uldarynyń erlik áreketiniń beinejazbadan kórip tańǵalǵandaryn jasyrmady. Sol kúni ákesi balalaryna ózenge barmaý keregin eskertken, sodan bolar ol balalardyń artynan ileskenimen muz ústine shyǵyp oinaýǵa asyqpaǵan. Biraq kómek kerek balalarǵa tartynbastan bardy.
"Men ómirimdi oilamai, qoryqpai, dostarymdy qutqardym. Olar maǵan raqmet aitty, sodan 6 politsei kelgenin bilemin. Ákem ózenge barma degesin ursama dep oiladym, ákem urysqan joq", - dedi Dinmuhammed Jańbyrbai.
