Atyraýda sábiin birneshe ret pyshaqtaǵan áiel qylmystyq jaýapkershilikten bosatyldy, dep habarlaidy QazAqparat.
Qylmystyq is Atyraý oblysynyń qylmystyq ister jónindegi mamandandyrylǵan aýdanaralyq sotynda qaraldy.
Aiyptalýshyǵa QR Qylmystyq kodeksiniń 99-babynyń 3-bóligimen 4 ailyq qyzyn qasaqana óltirdi degen aiyp taǵyldy. Qylmystyq is meditsinalyq sipattaǵy májbúrleý sharalaryn qoldaný úshin sotqa berilgen edi.
Sot talqylaýy kezinde mynadai jait anyqtalǵan. 41 jastaǵy áiel 2020 jyldyń jeltoqsan aiynda qyzyn ómirge ákelgen. Bosaný kezinde jáne odan keiin anasy men balanyń densaýlyǵy qalypty, qanaǵattanarlyq jaǵdaida bolǵan.
2021 jyldyń 26 sáýirinde úiinde óz qyzymen ońashada qalǵan. Qatty jylaǵan qyzyn tynyshtandyra almaǵan anasy ashý ústinde ashana bólmesinen qolyna pyshaq alǵan. Jylaýyn toqtatpaǵan qyzynyń dármensiz kúide ekenin bilse de, óziniń qylmystyń nietin júzege asyrý úshin nárestege dene jaraqatyn salǵan.
«Saraptama qorytyndysyna sáikes, A.B. «Paranoidty shizofreniia» sozylmaly psihikalyq aýrýmen aýyrǵan jáne qazirgi kezde zardap shegedi. Psihikalyq aýrýy bala bosanǵannan keiin bolmaǵan. Sarapshylar qylmys jasaǵan ýaqytta ol óziniń jasaǵan áreketin túsinbegenin kórsetip, ony mamandandyrylǵan psihiatriialyq statsionarda májbúrlep emdeýdi usynǵan. Sotta A.B.-nyń kinási jábirlenýshi jubaiynyń, kýálardyń jaýaptarymen, múrdeni qaraý hattamasymen, saraptama qorytyndylarymen, beinejazbalarmen dálelin tapty. Sot qaýlysymen A.B.-nyń adam óltirýdi esi durys emes jaǵdaida jasaǵany dáleldendi. Alaida, sotpen qoldanylýy mindetti QR Qylmystyq Kodeksiniń 16-babynyń talabyna sáikes qylmystyq jaýaptylyqtan bosatylyp, oǵan qatysty meditsinalyq sipattaǵy májbúrleý sharalary qoldanyldy» - dep habarlady Atyraý oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
Sot qaýlysy zańdy kúshine engen joq.
Buǵan deiin Atyraýda 4 ailyq balasyn 38 ret pyshaqtaǵan áieldiń isi sotta qaralyp jatqanyn habardar etkenbiz.
