Atyraýda politsiia sýǵa batqan áieldi qutqaryp, óz mert boldy. Bul jaiynda QR IIM keńesshisi - resmi ókil Nurdildá Oraz aitty, dep habarlaidy "Ult aqparat".
21 naýryz kúni keshki saǵat 21-52-de «102» pýltine belgisiz adam habarlasyp, ortalyq kópirden bir adamnyń sýǵa sekirgenin habarlady. Atyraý qalalyq politsiia basqarmasynyń jeke quramy shuǵyl arada qulaqtandyryldy. Oqiǵa ornyna birinshi jetken patrýldik politsiia serjany Shalqar Aqymǵaliev oilanbastan muzdai sýǵa túsken.
«Jaǵalaýda rolikpen serýendegennen keiin demalyp almaq bolǵan kezimizde sýitsidke tosynnan kýá boldyq. Men birden politsiiaǵa habarladym. Sanaýly sekýndtar ishinde oqiǵa ornyna jetken politsiia qyzmetkerleriniń biri batyp bara jatqan adamǵa tez júzip bardy. Sý muzdai, oǵan qosa qatty aǵys qyzdy qalai aǵyzyp bara jatqany da kórinip turdy. Biraq, politsiia qyzmetkeri óz ómirin táýekelge tigip, batqan adamdy qutqarýǵa talpynysyn toqtatqan joq», - deidi oqiǵa kýágeri Raiymbek Sarbalin.
Shalqarǵa kómekke ózimen birge bóreneni alyp sýǵa túsken politsiia kishi leitenanty Rústembek Súndetov umtylǵan.
«Sýǵa batqan adamǵa jetken kezimde Shalqar aǵysqa tótep bere almai batyp ketti. Áieldi qutqarý mańyzdy boldy. Onyń ústine áiel «ol men úshin óldi» dep aiqailap, esti shyǵardy», - dep eske alady Rústembek Súndetov.
Ajaldan qutqarylǵan Batys Qazaqstan oblysynyń týmasy jedel járdem kóligimen oblystyq aýrýhanasynyń reanimatsiia bólimshesine jetkizilgen. Al Rústembektiń áriptesin óz betinshe izdeýi esh nátije bermedi. 3 gradýs muzdai sýda sińiri tartylǵan 30 jastaǵy kishi leitenant Súndetov jaǵaǵa ózi júzip jetken.
«00-50-de Shalqar Aqymǵalievtiń múrdesi oqiǵa ornynan tómen jaqtan tabylyp, jaǵaǵa shyǵaryldy. Shalqar Aqymǵaliev kópbalaly otbasynyń jalǵyz asyraýshysy. Boidaq, 1 sáýirde 25 jasqa tolatyn edi. Otanyna 5 jyl boiy adal qyzmet etip kele jatqan ol sýǵa batqan áieldi qutqaramyn dep óz ómirin qidy. Ishki ister organdarynyń basshylyǵy men jeke quramy qaza bolǵan azamattyń otbasy men týǵan-týystaryna qaiǵyryp kóńil aitady», - dedi Nurdildá Oraz.
