اتىراۋدا پوليتسييا سۋعا باتقان ەيەلدٸ قۇتقارىپ, ٶز مەرت بولدى. بۇل جايىندا قر ٸٸم كەڭەسشٸسٸ - رەسمي ٶكٸل نۇردٸلدە وراز ايتتى, دەپ حابارلايدى "ۇلت اقپارات".
21 ناۋرىز كٷنٸ كەشكٸ ساعات 21-52-دە «102» پۋلتٸنە بەلگٸسٸز ادام حابارلاسىپ, ورتالىق كٶپٸردەن بٸر ادامنىڭ سۋعا سەكٸرگەنٸن حابارلادى. اتىراۋ قالالىق پوليتسييا باسقارماسىنىڭ جەكە قۇرامى شۇعىل ارادا قۇلاقتاندىرىلدى. وقيعا ورنىنا بٸرٸنشٸ جەتكەن پاترۋلدٸك پوليتسييا سەرجانى شالقار اقىمعاليەۆ ويلانباستان مۇزداي سۋعا تٷسكەن.
«جاعالاۋدا روليكپەن سەرۋەندەگەننەن كەيٸن دەمالىپ الماق بولعان كەزٸمٸزدە سۋيتسيدكە توسىننان كۋە بولدىق. مەن بٸردەن پوليتسيياعا حابارلادىم. ساناۋلى سەكۋندتار ٸشٸندە وقيعا ورنىنا جەتكەن پوليتسييا قىزمەتكەرلەرٸنٸڭ بٸرٸ باتىپ بارا جاتقان ادامعا تەز جٷزٸپ باردى. سۋ مۇزداي, وعان قوسا قاتتى اعىس قىزدى قالاي اعىزىپ بارا جاتقانى دا كٶرٸنٸپ تۇردى. بٸراق, پوليتسييا قىزمەتكەرٸ ٶز ٶمٸرٸن تەۋەكەلگە تٸگٸپ, باتقان ادامدى قۇتقارۋعا تالپىنىسىن توقتاتقان جوق», - دەيدٸ وقيعا كۋەگەرٸ رايىمبەك ساربالين.
شالقارعا كٶمەككە ٶزٸمەن بٸرگە بٶرەنەنٸ الىپ سۋعا تٷسكەن پوليتسييا كٸشٸ لەيتەنانتى رٷستەمبەك سٷندەتوۆ ۇمتىلعان.
«سۋعا باتقان ادامعا جەتكەن كەزٸمدە شالقار اعىسقا تٶتەپ بەرە الماي باتىپ كەتتٸ. ەيەلدٸ قۇتقارۋ ماڭىزدى بولدى. ونىڭ ٷستٸنە ەيەل «ول مەن ٷشٸن ٶلدٸ» دەپ ايقايلاپ, ەستٸ شىعاردى», - دەپ ەسكە الادى رٷستەمبەك سٷندەتوۆ.
اجالدان قۇتقارىلعان باتىس قازاقستان وبلىسىنىڭ تۋماسى جەدەل جەردەم كٶلٸگٸمەن وبلىستىق اۋرۋحاناسىنىڭ رەانيماتسييا بٶلٸمشەسٸنە جەتكٸزٸلگەن. ال رٷستەمبەكتٸڭ ەرٸپتەسٸن ٶز بەتٸنشە ٸزدەۋٸ ەش نەتيجە بەرمەدٸ. 3 گرادۋس مۇزداي سۋدا سٸڭٸرٸ تارتىلعان 30 جاستاعى كٸشٸ لەيتەنانت سٷندەتوۆ جاعاعا ٶزٸ جٷزٸپ جەتكەن.
«00-50-دە شالقار اقىمعاليەۆتٸڭ مٷردەسٸ وقيعا ورنىنان تٶمەن جاقتان تابىلىپ, جاعاعا شىعارىلدى. شالقار اقىمعاليەۆ كٶپبالالى وتباسىنىڭ جالعىز اسىراۋشىسى. بويداق, 1 سەۋٸردە 25 جاسقا تولاتىن ەدٸ. وتانىنا 5 جىل بويى ادال قىزمەت ەتٸپ كەلە جاتقان ول سۋعا باتقان ەيەلدٸ قۇتقارامىن دەپ ٶز ٶمٸرٸن قيدى. ٸشكٸ ٸستەر ورگاندارىنىڭ باسشىلىعى مەن جەكە قۇرامى قازا بولعان ازاماتتىڭ وتباسى مەن تۋعان-تۋىستارىنا قايعىرىپ كٶڭٸل ايتادى», - دەدٸ نۇردٸلدە وراز.
