Atyraýda Qazaqstannyń Eńbek eri, aqyn, jazýshy Muhtar Shahanovtyń jyr keshi ótti, dep habarlaidy QazAqparat.
Mahambet atyndaǵy oblystyq akademiialyq qazaq drama teatrynda Muhtar Shahanovtyń 80 jasqa tolý mereitoiyna orai «Ǵasyrdyń ǵalamat aqyny» atty poeziia keshi ótti.
Muhtar Shahanovtyń aldaspan aqyn Mahambet rýhyna, kósile aqqan Jaiyq ózenine ińkárligi týyndylarynan anyq ańǵarylady. Sol sebepten shyǵarmashylyq kesh aqynnyń shoqtyǵy biik jyrlarynan quralǵan «Sálem, uly Jaiyǵym!» atty teatrlandyrylǵan prologpen ashyldy. Budan soń oblys ákimi Serik Shápkenov mereitoi iesin quttyqtap, berekeli ǵumyr men shyǵarmashylyq shabyt tiledi.
«Biz búgin jyrlaryn qazaq halqy jatqa biletin aqyn, Jeltoqsan jylnamasynan roman-epopeia jazǵan jazýshy, ánderin barsha jurt shyrqaǵan kompozitor, qazaq tiliniń qamy úshin shybyn janyn shúberekke túiip kúresken qairatker Muhtar Shahanovpen kezdesip otyrmyz. Muhitqa quiatyn ózen sekildi tabiǵat syiǵa bergen bar talantyn, azamattyq asyl qasietin joǵary baǵalap, Memleket basshysy Qasym-Jomart Toqaev Ulytaýda ótken Ulttyq quryltaidyń alǵashqy otyrysynda «Bul kisi óte adal, shynshyl, ultjandy adam. Men Muhtar Shahanovqa Qazaqstannyń Eńbek eri ataǵyn berý týraly Jarlyqqa qol qoidym» dep joǵary baǵa berdi. Budan artyq qandai baǵa berýge bolady. Jyr súigen, sóz qadirlegen Atyraý jurtshylyǵynyń atynan biigińizben súisindirip, tereńdigińizben oilandyryp, ortamyzda árdáiim aman júrýińizge tilekshimin», - dedi Serik Shápkenov.
Óz kezeginde qazaq poeziiasynyń tanymal ókili, aqyn Muhtar Shahanov jibekke tizgen laǵyl monshaqtai aq batysyn berip, Atyraý jurtshylyǵyna alǵys bildirdi.
Jyr keshinde aqynnyń sózine jazylǵan ánder shyrqalyp, óleńderi oqyldy.
