Atyraýda «ýnitazǵa bailanǵan múgedek balalar» týraly videoǵa túsinik berildi, dep habarlaidy "Ult aqparat".
Oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Alfiia Tóleǵarievanyń aitýynsha, bul videony biylǵy jyldyń 8 sáýirinde sharýashylyq bikesi túsirgen.
«Basqarma basshylyǵy atalǵan videoǵa bailanysty №3 oblystyq arnaýly áleýmettik qyzmet kórsetý ortalyǵynyń qyzmetkerlerimen jiyn ótkizip, túsinik jumystaryn júrgizdi. Tiisti baqylaý júrgizbegen ortalyq direktoryna «qatań sógis» berilip, tártiptik jaza qoldanyldy», - dedi Alfiia Tóleǵarieva.
Maýsym aiynda oblystyq prokýratýra ortalyqtaǵy balalardyń quqyqtaryn qorǵaý zańdylyǵyna keshendi tekserý júrgizgen. Oblys ákiminiń birinshi orynbasary men ÚEU ókilderi ortalyqtaǵy qyzmet kórsetý barysymen tanysqan.
Sondai-aq, oblys ákiminiń orynbasary men kámeletke tolmaǵan balalardyń quqyǵyn qorǵaý jónindegi komissiia prokýratýra, depýtattar, memlekettik organdar ókilderiniń qatysýymen kóshpeli otyrys ótkizgen. Komissiia músheleri ortalyqty aralap, balalardyń jaǵdaiymen, tamaqtaný jaiymen jiti tanysqan.
Alfiia Tóleǵarievanyń aitýynsha, ortalyqta múlik urlyǵy oryn alyp, oǵan sharýashylyq bikesiniń qatysy bary anyqtalǵan.
«Qoldanystaǵy zańnamaǵa sáikes, sharýashylyq bikesi istiń mán-jaiy anyqtalǵanǵa deiin qyzmetten ýaqytsha shettetildi. Qazir ol ortalyqtyń qyzmetkeri emes. Ortalyq ujymy onyń ústinen oblys prokýrorynyń atyna ujymdyq aryz jazdy. Aryzda onyń qyzmettik etikany saqtamaýy, urlyqqa barǵany, jala jabý men basqa da zańbuzýshylyqtar týraly aitylǵan. Qazir Atyraý qalalyq politsiia basqarmasy taralǵan beinejazbaǵa qatysty tekserý júrgizýde», - deidi Alfiia Tóleǵarieva.
