Atyraýda kópbalaly otbasylarǵa arnalǵan 160 páter eki jyl boiy turalap qaldy. Bul týraly Respýblikalyq biýdjettiń atqarylýyn baqylaý jónindegi esep komitetiniń otyrysynda aityldy, dep habarlaidy QazAqparat.
«Qalalyq qurylys bólimi az qamtylǵan kópbalaly otbasylar úshin jalpy quny 1,4 mlrd teńgege 173 páter satyp aldy. Onyń ishinde quny 1,3 mlrd teńge bolatyn 160 páter 21 aidan astam ýaqyt boiy jergilikti atqarýshy organnyń kezeginde turǵandarǵa bólinbedi», - dedi Esep komitetiniń múshesi Rashit Ahmetov Atyraý oblysyna bólingen biýdjet qarajaty aýditiniń qorytyndysynda.
Otyrys barysynda Esep komitetiniń tóraiymy Natalia Godýnova bul jaǵdaidyń sebebin surady.
Anyqtalǵandai, bar másele páterlerdiń aýmaǵynda bolyp shyqty - bul páterler kópbalaly otbasylarǵa arnalsa da, aýdany 60 sharshy metrden az.
Esep komitetiniń basshysy muny azamattardy kemsitý dep atady jáne osy máseleni sheship, kinálilerdi jaýapqa tartýdy surady.
Aita keteiik, Esep komiteti Atyraý oblysyna bólingen biýdjet qarajatyn paidalaný tiimdiligine aýdit júrgizgen. Aýdit nátijesinde rásimdik sipattaǵy 223 buzýshylyq, 5 júieli kemshilik anyqtalǵan. 22,7 mlrd teńgeni tiimsiz josparlaý, 7,8 mlrd teńgeni tiimsiz paidalaný, 0,2 mlrd teńge yqtimal shyǵyndar tirkelgen.
Aýdit qorytyndysy boiynsha Esep komiteti Úkimetke zańnamany jetildirý jónindegi tiisti usynymdar berdi. Atyraý oblysynyń ákimine anyqtalǵan buzýshylyqtar men kemshilikterdi joiý boiynsha shara qabyldaýǵa jáne qoldanystaǵy zańnamany buzýǵa jol bergen laýazymdy tulǵalardyń jaýapkershiligin qaraýǵa tapsyrma berildi.
Ákimshilik isterdi qaraýǵa ýákiletti organdarǵa 40 buzýshylyq faktileri boiynsha material jiberilgen.
