Atyraýda káriz qudyǵyna qulaǵan 11 jasar bala oblystyq balalar aýrýhanasyna jetkizildi, dep habarlaidy QazAqparat.
Oqys oqiǵa Atyraý qalasynyń mańyndaǵy Geolog eldi mekeninde keshe, 20 mamyrda bolǵan.
Mektep janyndaǵy káriz qudyǵyna qulaǵan 11 jasar bala túrli jaraqat alǵan. Meditsinalyq jedel járdem brigadasy saǵat 12:25-te jaraqaty bar balany oblystyq balalar aýrýhanasyna jetkizgen.
«Aýrýhananyń travmatolog-dárigeri balanyń jaraqatyn tekserdi. Balanyń bas súiegi rentgenge túsirilip, alǵashqy hirýrgiialyq em júrgizildi. Bas súieginiń samai bóligi, oń jaq tizesi kógergen. Meditsinalyq tekserýden, alǵashqy kómek kórsetilgennen keiin bala turǵylyqty meken-jaiy boiynsha ambýlatorlyq baqylaýǵa jiberildi», - dep habarlady oblystyq balalar aýrýhanasynyń baspasóz qyzmeti.
Osyǵan bailanysty «Atyraý oblysy sý arnasy» MKK-nyń mamandary mektep janyndaǵy káriz qudyǵyn jaýyp, onyń aýmaǵyn qorshaǵan.
«Geolog eldi mekeninde káriz qudyǵyn ornatý úshin jumys júrgizilip jatqan edi. Qudyq jabylyp, onyń aýmaǵy qorshaldy. Jumysshylar qudyqtyń syrtyna tógiletin topyraqtyń jetkizilýin kútken edi. Sol mańnan ótip bara jatqan balalar qorshaýdyń artyna júgire jóneldi. Olar toqtaý jónindegi eskertýge jaýap bergen joq. Nátijesinde olardyń biri qudyqqa túsip ketti», - delingen kásiporyn taratqan aqparatta.
