اتىراۋدا كەرٸز قۇدىعىنا قۇلاعان 11 جاسار بالا وبلىستىق بالالار اۋرۋحاناسىنا جەتكٸزٸلدٸ, دەپ حابارلايدى قازاقپارات.
وقىس وقيعا اتىراۋ قالاسىنىڭ ماڭىنداعى گەولوگ ەلدٸ مەكەنٸندە كەشە, 20 مامىردا بولعان.
مەكتەپ جانىنداعى كەرٸز قۇدىعىنا قۇلاعان 11 جاسار بالا تٷرلٸ جاراقات العان. مەديتسينالىق جەدەل جەردەم بريگاداسى ساعات 12:25-تە جاراقاتى بار بالانى وبلىستىق بالالار اۋرۋحاناسىنا جەتكٸزگەن.
«اۋرۋحانانىڭ تراۆماتولوگ-دەرٸگەرٸ بالانىڭ جاراقاتىن تەكسەردٸ. بالانىڭ باس سٷيەگٸ رەنتگەنگە تٷسٸرٸلٸپ, العاشقى حيرۋرگييالىق ەم جٷرگٸزٸلدٸ. باس سٷيەگٸنٸڭ ساماي بٶلٸگٸ, وڭ جاق تٸزەسٸ كٶگەرگەن. مەديتسينالىق تەكسەرۋدەن, العاشقى كٶمەك كٶرسەتٸلگەننەن كەيٸن بالا تۇرعىلىقتى مەكەن-جايى بويىنشا امبۋلاتورلىق باقىلاۋعا جٸبەرٸلدٸ», - دەپ حابارلادى وبلىستىق بالالار اۋرۋحاناسىنىڭ باسپاسٶز قىزمەتٸ.
وسىعان بايلانىستى «اتىراۋ وبلىسى سۋ ارناسى» مكك-نىڭ ماماندارى مەكتەپ جانىنداعى كەرٸز قۇدىعىن جاۋىپ, ونىڭ اۋماعىن قورشاعان.
«گەولوگ ەلدٸ مەكەنٸندە كەرٸز قۇدىعىن ورناتۋ ٷشٸن جۇمىس جٷرگٸزٸلٸپ جاتقان ەدٸ. قۇدىق جابىلىپ, ونىڭ اۋماعى قورشالدى. جۇمىسشىلار قۇدىقتىڭ سىرتىنا تٶگٸلەتٸن توپىراقتىڭ جەتكٸزٸلۋٸن كٷتكەن ەدٸ. سول ماڭنان ٶتٸپ بارا جاتقان بالالار قورشاۋدىڭ ارتىنا جٷگٸرە جٶنەلدٸ. ولار توقتاۋ جٶنٸندەگٸ ەسكەرتۋگە جاۋاپ بەرگەن جوق. نەتيجەسٸندە ولاردىڭ بٸرٸ قۇدىققا تٷسٸپ كەتتٸ», - دەلٸنگەن كەسٸپورىن تاراتقان اقپاراتتا.
