Áleýmettik jelide Atyraýdaǵy meshitterdiń birine kelgen azamatty birneshe adam syrtqa shyǵarýǵa talpynǵan video tarap, ol kópshiliktiń qyzý talqysyna tústi. Bul jaitqa qatysty Atyraý selolyq okrýgi meshitiniń bas imamy Sanat Bólekbaiuly pikir bildirdi, dep habarlaidy KAZ.NUR.KZ tilshisi.
Din qyzmetkeriniń aitýynsha, oqiǵa 19 tamyz kúni Atyraý qalasyndaǵy Atyraý selolyq okrýginiń meshitinde bolǵan. Meshitte juma namazy kezinde imam ýaǵyz aityp jatqanda meshittiń turaqty jamaǵatynyń biri telefonyn qarap, ýaǵyzdy tyńdamai, imamǵa baǵynbai "Bul ne zań?" dep shý shyǵarǵan.
"Azamatqa birneshe ret eskertý jasaldy, degenmen tártipke baǵynbady. Kónbegen soń jamaǵatqa ol kisini syrtqa shyǵarýyna týra keldi. 35 jastaǵy er adam - óz aýylymyzdyń turǵyny. Onyń teris aǵymnyń jeteginde júrgeni anyqtaldy. Osyǵan deiin de ol azamatqa imamǵa baǵynbaǵany úshin birneshe ret eskertý jasalǵan", - deii Sanat Bólekbaiuly.
Imamnyń aitýynsha, bul jaittan keiin aýyl turǵynymen meshittiń naib imamdary jeke sóilesip, túsindirý jumystaryn júrgizgen. Nátijesinde er adam kinásin túsinip, jamaǵattan keshirim suraǵan.
Sondai-aq Atyraý oblystyq PD-niń baspasóz qyzmetiniń málimetinshe, imamnyń birneshe eskertýin oryndamaǵan azamatqa qatysty QR ÁQBtK-niń 490-baby 2-bóligi boiynsha ákimshilik hattama toltyrylǵan.
