Atyraýda politseimen tóbelesken er adam qamaýǵa alyndy, dep habarlaidy Sputnik Qazaqstan oblystyq politsiia departamentine silteme jasap.
Resmi málimetke sáikes, 5-móltek aýdanynda ornalasqan "Ideal" sýpermarketinde janjal shyqqany týraly habar túsken. Ol jerge dereý ýchaskelik politsiia inspektory barǵan. Jábirlenýshiden aryz alý kezinde janjal shyǵarǵan mas turǵyn politsiianyń zańdy talabyna baǵynbaǵan. Al dalaǵa shyqqannan keiin qarsylyq kórsetken.
Tártip buzǵan er adam Ákimshilik quqyq buzýshylyq týraly kodekstiń birneshe baby boiynsha jazaǵa tartyldy. Aldymen 440-babynyń 3-bólimimen (Alkogoldik ishimdik ishý nemese qoǵamdyq oryndarǵa masań kúide kelý) 14 585 teńge kóleminde aiyppul salyndy.
"Budan bólek, 434-babynyń 1-bólimi (Usaq buzaqylyq) jáne 667-babynyń 1-bólimi (Quqyq qorǵaý organy nemese arnaýly memlekettik organ, áskeri politsiia organy qyzmetkeriniń (áskeri qyzmetshisiniń), sot pristavynyń, sot oryndaýshysynyń zańdy ókimine nemese talabyna baǵynbaý) boiynsha ákimshilik hattama toltyrylyp, sot sheshimimen 36 jastaǵy azamat 10 táýlikke qamaýǵa alyndy", - deidi politseiler.
