Atyraýdaǵy Mahambet atyndaǵy akademiialyq qazaq drama teatrynda álem elderine ónerimen tanylǵan eń jas kompozitor, «Daryn» memlekettik jastar syilyǵynyń iegeri, «100 jańa esim» jobasynyń jeńimpazy Rahat-Bi Ábdisaǵinniń tegin kontserti ótti.
Ol – simfoniialyq orkestrge jáne kameralyq ansamblge arnalǵan 100-den astam týyndynyń avtory. Kóptegen halyqaralyq kompozitorlar men pianister konkýrsynyń jeńimpazy. Tabiǵi qabiletiniń arqasynda 13 jasynda stýdent atanyp, 17 jasynda Qurmanǵazy atyndaǵy Qazaq ulttyq konservatoriiasyn úzdik bitirgen. Atyraýda «Qazaqstannyń Motsarty» atanǵan daryn iesiniń tegin kontserti «Zymyran zaman» dep ataldy.
Bes júz oryndyq teatrǵa jinalǵan atyraýlyqtar Rahat-Bi Tólegenulynyń klassikalyq shyǵarmalaryn jyly qabyldady. Ásirese, jas kompozitordyń «Ómirge qushtarlyq», «Jyl qustarynyń syńsýy» sekildi birneshe týyndysy kórermendi baýrap aldy.
«Bul –meniń Atyraýdaǵy alǵashqy kontsertim. Kórermenniń klassikalyq ónerge de bet burǵany qýantady» deidi talantty kompozitor Rahat-Bi Ábdisaǵin.
