Atyraý turǵyny birneshe qymbat kólikti jalǵa alyp, keiin satyp jibergen, dep habarlaidy QazAqparat.
Oblystyq Politsiia departamentiniń baspasóz qyzmetinen málim etkendei, osy derekke bailanysty 29 jastaǵy jigit ustalǵan.
«Atyraý qalasynda turatyn 1993 jyly týǵan azamat 2020 jyldyń qańtarynan beri birneshe adamnan kelisimshart negizinde avtokólikterdi arendaǵa alǵan. Keiin jalǵa alǵan qymbat avtokólikterdi satyp jibergen.
Qazir 29 jastaǵy jigit alaiaqtyq jasady degen kúdikpen ustaldy. Atalǵan derekke qatysty Atyraý qalalyq politsiia basqarmasy QR Qylmystyq kodeksiniń 190-baby 4-bóligimen sotqa deiingi tergep-tekserý amaldaryn bastady», - dep habarlady departamenttiń baspasóz qyzmetinen.
Belgili bolǵandai, kúdiktige qatysty 13 qylmystyq is tergelip jatyr. Bastapqyda jábirlenýshilerdiń 13 kóligi tabylǵan. Politsiia qyzmetkerleri keiin taǵy eki kólikti anyqtai aldy.
«Qazir kúdikti S.M.-niń is-áreketinen zardap shekken adamdardy izdestirip jatyrmyz. Jábirlenýshilerden Atyraý oblystyq Politsiia departamentiniń tergeý basqarmasyna nemese 102 telefonyna habarlasýdy suraimyz», - dedi vedomstvodan.
