22 shildede «Atyraý» fýtbol komandasy «Ordabasymen» kezdesýde oisyrai utyldy. Osyǵan bailanysty fýtbol jankúierleri jergilikti komandaǵa narazylyq bildirdi, dep habarlaidy QazAqparat.
«Atyraý» komandasy fýtboldan Qazaqstan kýbogynyń toptyq kezeńinde qaita-qaita jeńilip júr. Sońǵy kezdesýde – «Ordabasy» komandasymen ótken matchta taǵy da jeńildi. Jergilikti komandanyń oisyrai utylýy fýtbol jankúierleriniń narazylyǵyn týǵyzdy.
«Biz biýdjetten bólingen qarajattyń bulaisha jelge ushqanyn qalamaimyz. Jergilikti komanda nege jeńile beredi? Bulai jalǵasa berse, fýtbol klýby legionerlerden «tazartylǵanyn» talap etemiz. Legionerlerdiń ornyna jergilikti jas fýtbolshylar oinasyn. Olar árine, jeńiske jetý úshin baryn salady. Tájiribe jinaidy. Bizdiń legionerlerden quralǵan komanda emes, óz fýtbol klýbymyz bolýy kerek», - dep narazylyq bildirdi fýtbol klýbynyń jankúierleri.
«Atyraý» fýtbol klýbynyń bas bapkeri Konstantin Gorovenko «Ordabasy» komandasymen ótken matchqa qatysty pikirin bildirdi.
«Bul oiyn biz oilaǵandai nátijeli bolmady. Óz alańymyzda 1:4 esebimen utyldyq. Komandanyń fýtbolshylary men jattyqtyrýshylar shtabyna oilaný kerek shyǵar. Mundai nátijesiz oiyn úshin jaýapkershilikti óz moinyma alamyn. Men komanda fýtbolshylaryna olardan ne kútetinimdi, qalai oinaý qajettigin jetkize almadym. Komanda oiynshylarynda kóshbasshylyq qasiet jetispedi. Alańda jeńiske jetýge degen yntany kórmedim. Fýtboldy dál osylai oinamaidy», - dedi Konstantin Gorovenko.
