Foto: gov.kz
31 mamyrda "Aqjaiyq" memlekettik tabiǵi rezervatynda tutanǵan qamys órti búgin tolyǵymen sóndirildi. Bul týraly Ekologiia jáne tabiǵi resýrstar ministrligi habarlady.
"2025 jylǵy 24 maýsym kúni saǵat 14:00-de "Aqjaiyq" memlekettik tabiǵi rezervatynyń aýmaǵynda oryn alǵan órt tolyqtai sóndirildi", – delingen ministrlik habarlamasynda.
Tilsiz jaýmen kúreske Tótenshe jaǵdailar ministrliginiń 150 qyzmetkeri jáne 35 tehnika birligi jumyldyryldy. Órt sebebi áli anyqtalǵan joq. Ministrliktiń habarlaýynsha, TJM qyzmetkerleri qazirgi tańda órttiń shyǵý sebepterin anyqtap jatyr.
Aita keteiik, "Aqjaiyq" memlekettik tabiǵi rezervatynda qamys órti bir aiǵa dýyq byqsyp jandy. Tabiǵi apat saldarynan Atyraý qalasynyń halqy kók tútinge tunshyǵyp, zardap shekti.
Qyzyl jalyn 1500 gektardan astam aýmaqty sharpyǵan. Sý jaǵasyndaǵy qamys otqa oranǵany sebepti, órtti sóndirý jumystary uzaqqa sozylǵan.
Sondai-aq mineraldy jolaq júrgizýge qosymsha 10 aýyl sharýashylyǵy tehnikasy jumyldyryldy. Al órttiń shyǵý sebebin anyqtaý úshin qylmystyq is qozǵalyp, tergep-tekserý bastaldy. Sebebi, baqylaý júieleri óshirilgen bolýy múmkin degen boljam aityldy.
