Atyraý oblysynda jańa jobalar boiynsha negizgi kapitalǵa qosymsha 8,3 trln teńge investitsiia tartylady. Bul týraly Úkimet otyrysynda Atyraý oblysyn damytýdyń 2021-2025 jyldarǵa arnalǵan keshendi josparyn talqylaý kezinde óńir ákimi Mahambet Dosmuhambetov aitty, dep habarlaidy QazAqparat tilshisi.
«Memleket basshysynyń tapsyrmasymen jáne Úkimettiń qoldaý kórsetýimen óńirdiń eń mańyzdy, túiindi máselelerin sheshýge jáne óńirdi odan ári tiimdi damytýǵa baǵyttalǵan oblystyń Keshendi damý jospary jańartyldy. Keshendi jospar jobasynyń jalpy somasy 8,9 trln teńgeni quraityn 185 is-sharany qamtyp otyr. Nátijesinde, respýblikalyq biýdjetten 535,7 mlrd teńge, jergilikti biýdjetten 112,6 mlrd teńge, basqa qarajat kózderinen 8,3 trln teńge, memlekettik jekeshelik áriptestik aiasynda 14,3 mlrd teńge qarastyrý josparlanýda», - dedi M. Dosmuhambetov.
Onyń aitýynsha, 185 is-shara 15 baǵytta júzege asyrylady. Atap aitqanda, ekonomikalyq damý baǵyty boiynsha: ónerkásip, aýyl jáne balyq shaýashylyǵy, týrizm, kásipkerlikti damytý salalarynda 8 trln teńge kóleminde 78 is-sharany iske asyrý qolǵa alynady.
Jalpy quny 728,8 mlrd teńgeni quraityn 66 is-shara turǵyn-úi, sý, gaz, elektrmen jabdyqtaý jáne transporttyq infraqurylym men ekologiia máselerin sheshýge baǵyttalǵan.
Áleýmettik sala, jumyspen qamtý jáne azamattyq qorǵaýdy qamtamasyz etý baǵyty boiynsha 41 is-shara engizilip otyr, jalpy josparlanyp otyrǵan qarajat 223,8 mlrd teńgeni quraidy.
«2022 jylǵa josparlanǵan Atyraý oblysynyń keshendi josparynda is-sharalardy iske asyrýǵa respýblikalyq biýdjetten 98 mlrd 900 mln teńge josparlanyp otyr. Osyǵan bailanysty, bekitilgen qarajattan basqa ústimizdegi jyly belgilengen maqsattarǵa qol jetkizý úshin, respýblikalyq biýdjetten qosymsha 67 mlrd teńge bólýge yqpal etýińizdi suraimyz», - dedi oblys ákimi Úkimet basshysy Álihan Smaiylovqa qarata aitqan sózinde.
Keshendi jospar aiasynda josparlanǵan biýdjet qarajaty tolyqtai bólingen jaǵdaida 2025 jyldyń sońyna qarai kelesidei nátijelerge qol jetkizý kútilýde:
- óńirdiń aýyl sharýashylyǵy jalpy óniminiń kólemin 11% - ǵa nemese 96 mlrd teńgege deiin ulǵaitý;
- shaǵyn jáne orta bizneste jumys isteitin sýbektiler sanyn 5 myńǵa, iaǵni, 55 myńǵa deiin kóbeitý, jalpy óńirlik ónimdegi biznestiń úlesin 25,2% - ǵa deiin jetkizý;
- Atyraý qalasyndaǵy sarqyndy sýlardy tazartýmen qamtýdy 90% - ǵa deiin jetkizý;
- jaqsy jáne qanaǵattanarlyq jaǵdaidaǵy joldardyń úlesin 95% - ǵa deiin arttyrý;
- jańa jobalar boiynsha negizgi kapitalǵa qosymsha 8,3 trln teńge investitsiia tartý josparlanýda.
«Bul rette atap ótetin mańyzdy másele - Keshendi jospar aiasynda jasalǵan investitsiialardan negizgi qaitarym 10-15 jyl ishinde bolady, óitkeni olar uzaq merzimdi sipatqa ie», - dedi ol.
Budan buryn habarlanǵandai, búgin Úkimet otyrysynda elimizdiń batys óńirlerin keshendi damytýdyń josparlary tanystyryldy.
Jalpy, keshendi josparlardy iske asyrý batys óńirler ekonomikasynyń ósý qarqynyn ulǵaitýǵa múmkindik beredi, jeke investitsiialar aǵynyna serpin beredi jáne halyqtyń ómir súrý sapasy men ál-aýqatyn arttyrýdy qamtamasyz etedi. 2025 jylǵa qarai tórt óńir boiynsha shamamen 13 trln teńge jeke investitsiia tartý, 175 myńǵa jýyq jańa jumys ornyn qurý kózdelgen.
