Atyraýda Ekologiia, geologiia jáne tabiǵi resýrstar ministri Serikqali Brekeshev pen oblys ákimi Mahambet Dosmuhambetovtiń qatysýymen keńes ótti. Onda óńirdiń ekologiialyq problemalary talqylandy, dep habarlaidy QazAqparat.
Ministr Serikqali Brekeshevtiń aitýynsha, sońǵy jyldary óńir turǵyndaryn Jaiyq ózenindegi ekologiialyq ahýal alańdatady. Bul kóp talqylanatyn máselege ainaldy.
«Qazir Jaiyq ózeniniń deńgeii tómendedi. Oiyl, Jem jáne Saǵyz ózenderindegi jaǵdai da osyǵan uqsas. Bul óńir ekologiiasyna keri áser etedi. Jaiyq ózenindegi ahýalǵa bailanysty byltyrǵy naýryzda Resei Federatsiiasynyń Orynbor qalasynda transshekaralyq ózen basseininiń ekojúiesin 2024 jylǵa deiin saqtaý jáne qalpyna keltirý boiynsha Qazaqstan-Resei yntymaqtastyǵynyń baǵdarlamasy bekitildi. Al, Oiyl jáne Saǵyz ózenderiniń deńgeii sýdyń az kelýi saldarynan tómendegeni baiqalyp otyr. Bul ózender arnasyndaǵy sýdyń 80-90%-dan astamy kóktemgi sý tasqyny kezinde tolady. Osyǵan bailanysty «Qazgidromet» Aqtóbe oblysynyń aýmaǵynan Atyraý oblysyna keletin sý shyǵynyn esepke alý úshin Oiyl jáne Saǵyz ózenderiniń arnalarynda gidrobeket ornatý múmkindigin qarastyrýy qajet», -dedi Serikqali Brekeshev.
Ministr Atyraý oblysynyń aýmaǵyndaǵy Oiyl ózeniniń tómengi saǵasynda kóktemgi tasqyn sýdy jinaý úshin bóget salý máselesin pysyqtaýdy tapsyrdy.
Oiyl ózenindegi sý aǵyny men deńgeiin arttyrý maqsatynda osy jylǵy mamyr aiynyń sońyna deiin Aqtóbe oblysynyń aýmaǵyndaǵy iesiz sý sharýashylyǵy qurylystaryn buzý jumysyn aiaqtaýy qajet.
Osy kezge deiin Aqtóbe oblysynda jeti gidrotehnikalyq nysan buzylǵan. Endi kóktemgi sý tasqyny bastalǵanǵa deiin taǵy da osyndai 12 nysan buzylady.
Al, jyl sońyna deiin Saǵyz jáne Jem ózenderiniń basseinderindegi, onyń ishinde iesiz nysandardy túgendeý aiaqtalady.
Bul jumysty Jaiyq-Kaspii oblysaralyq bassein inspektsiiasy baqylaýǵa alady.
