Atyraý oblysy Qurmanǵazy aýdandyq aýrýhanasynyń naýqasqa kómek kórsetpegeni úshin aiyptalǵan eki dárigerine qatysty qylmystyq is qaralyp, sot úkimi shyqty, dep habarlaidy QazAqparat.
Dárigerlerge QR Qylmystyq kodeksi 317-babynyń 3-bóligimen aiyp taǵylǵan.
«Sot talqylaýynda myna jaittar anyqtaldy. Statsionardyń infektsionist dárigeri Sh. jáne anesteziolog-reanimatolog dárigeri J. 2020 jyldyń 29, 30, 31 jeltoqsanynda pnevmoniia jáne qant diabeti qosalqy aýrýy diagnozymen aýrýhanaǵa túsken naýqas K.-ǵa tiisti meditsinalyq kómek kórsetpegen. Dárigerlerdiń kásiptik mindetterine uqypsyz qaraýy jáne olardy tiisinshe oryndamaýy saldarynan naýqas qaitys boldy. Sottalýshylardyń kinási jábirlenýshilerdiń, kýálardyń, sarapshylardyń aiǵaqtarymen, komissiialyq sot-meditsinalyq saraptamanyń qorytyndysymen óz dálelin tapty», - dep málimdedi Qurmanǵazy aýdandyq sotynyń baspasóz qyzmetinen.
Prokýror eki sottalýshyǵa dárigerlik qyzmetpen ainalysý quqyǵynan 3 jyl, bas bostandyǵynan 2 jyl 6 ai merzimge aiyrý túrindegi jaza taǵaiyndaýdy, sondai-aq sottalýshylar onsha aýyr emes qylmys jasaǵandyqtan, olardy raqymshylyq aktisi boiynsha negizgi jazadan bosatýdy surady.
Sot jazany jeńildetetin mán-jailar retinde olardyń buryn sotty bolmaǵanyn, sottalýshy Sh.-nyń jas balalary baryn eskerdi.
«Sottalýshylardyń árqaisysynyń rólin jáne jábirlenýshilerdiń pikirin eskere otyryp, sot Sh.-ǵa 2 jyl 6 ai merzimge bas bostandyǵynan aiyrý túrindegi negizgi jazany, sondai-aq 3 jylǵa dárigerlik qyzmetpen ainalysý quqyǵynan aiyrý túrindegi qosymsha jazany taǵaiyndady. J.-ǵa 2 jyl 6 ai merzimge dárigerlik qyzmetpen ainalysý quqyǵynan aiyra otyryp, 2 jyl merzimge bas bostandyǵynan aiyrý jazasyn taǵaiyndady. Qylmystyq kodekske sáikes Sh. jáne J.-nyń áreketteri onsha aýyr emes qylmystarǵa jatatyndyqtan, «Qazaqstan Respýblikasy Táýelsizdiginiń 30 jyldyǵyna bailanysty raqymshylyq jasaý týraly» Zańǵa sáikes olar bas bostandyǵynan aiyrý túrindegi negizgi jazadan bosatyldy. Sottalǵandardan jábirlenýshilerdiń paidasyna 8 mln teńge moraldyq zalal ótemaqysy óndirildi», - dep málim etti aýdandyq sottyń baspasóz qyzmetinen.
Sot úkimi zańdy kúshine engen joq.
