Esep komiteti Atyraý oblysyndaǵy respýblikalyq biýdjettiń atqarylýy týraly qorytyndyny jariialady, dep habarlaidy QazAqparat.
Aýdit nátijesinde rásimdik sipattaǵy 223 buzýshylyq, 5 júieli kemshilik anyqtalǵan. 22,7 mlrd teńgeni tiimsiz josparlaý, 7,8 mlrd teńgeni tiimsiz paidalaný, 0,2 mlrd teńge yqtimal shyǵyndar tirkelgen.
Vedomstvonyń habarlaýynsha, «Áleýmettik meditsinalyq saqtandyrý qory» AQ COVID-19 indetimen kúres aiasynda epidemiiaǵa qarsy jumyldyrylǵan meditsina qyzmetkerlerine 105,9 mln teńge negizsiz qosymsha aqy tólegen.
Sondai-aq, jyl saiyn Atyraý oblysynyń 2016-2020 jyldarǵa arnalǵan aýmaqtardy damytý baǵdarlamasynyń oryndalmaǵan nysanaly indikatorlarynyń úlesi (14,8%-dan 28,3%-ǵa deiin) artyp keledi. Bul rette memlekettik baǵdarlamalardyń nysanaly indikatorlarynyń 58,4%-y baǵdarlamada kórsetilmegen. Oblystaǵy jergilikti atqarýshy organnyń memorandýmy 2018-2020 jyldary negizgi nysanaly indikatorlardyń orta eseppen 24%-y oryndalmaýyna jol bergen.
Aýdit qorytyndysy boiynsha Esep komiteti Úkimetke zańnamany jetildirý jónindegi tiisti usynymdar berdi. Atyraý oblysynyń ákimine anyqtalǵan buzýshylyqtar men kemshilikterdi joiý boiynsha shara qabyldaýǵa jáne qoldanystaǵy zańnamany buzýǵa jol bergen laýazymdy tulǵalardyń jaýapkershiligin qaraýǵa tapsyrma berildi.
Ákimshilik isterdi qaraýǵa ýákiletti organdarǵa 40 buzýshylyq faktileri boiynsha material jiberilgen.
