Kópbalaly, jalǵyzbasty jáne áleýmettik jaǵynan az qamtylǵan analardy qoldaýǵa arnalǵan shara birinshi kezekte 200 adamdy qamtidy, dep habarlaidy "Ult aqparat" Óńirlik kommýnikatsiialar qyzmetine silteme jasap.
Atyraýda «Jaiyq» sport kesheninde oblys ákiminiń esep berý kezdesýi jalǵasýda. Nurlan Noǵaev eki myń adamnyń aldynda «Atyraý oblysynyń 2018 jylǵy áleýmettik-ekonomikalyq damý qortyndylary týraly» baiandama jasap, biylǵy josparlardy atap ótti.
Nurlan Noǵaevtyń aitýynsha, qazir aimaqta kópbalaly jumyssyz analardy, jalǵyzbasty, múgedek bala tárbielep otyrǵan jáne áleýmettik jaǵynan az qamtylǵan analardy qoldaýǵa baǵyttalǵan jańa sharalar jasalǵan. Shara aiasynda analar jańa mamandyq meńgerýdiń qysqa merzimdi kýrstaryna qatysady. Birinshi kezeńde kýrsqa 200 adam qatysady degen jospar bar. Áielderdiń tańdaýlaryna 10 kásibi baǵyt beriledi, kýrs 15 kúnge deiin sozylady. Oqý aiaqtalǵan soń qatysýshylarǵa sertifikat beriledi.
«Kýrstardy Azamattyq ortalyqtyń mamandary daiyndady. Bizdiń maqsatymyz - áielderdi kásipkerlik negizderine oqytý, sol arqyly óz isterin bastap, maqsattaryn aiqyndap, alǵa qarai damýlaryna qoldaý kórsetý. Búginde óńirdegi kásipkerlerdiń 47% - áielder. Bul kórsetkishti áli de arttyrý kerek», - dedi Atyraý oblysynyń ákimi.
Jumyssyz analardy oqytatyn on baǵyttyń ishinde tiginshi, aspaz, shashtaraz, manikiýr, vizaj, býhgalteriia, emdik massaj, internet-saýda daǵdysy, SMM sekildi kýrstar bar. Oqý aptasyna úsh ret júredi, naýryz aiynan bastap top jinalady.
«Kýrs barysynda áielder jańa mamandyqty igerip qana qoimai, áleýmettik jelilerde is júrgizý, marketing pen biznes negizderine onlain rejimde oqi alady», - dedi Nurlan Noǵaev.
Atalǵan kýrstarǵa oqýǵa jumyssyz kópbalaly analar, jalǵyzbasty analar, múgedek bala tárbielep otyrǵan jáne áleýmettik osal toptaǵy analar shaqyrylady.
Aita keteiik, Atyraý oblysynda 1 aqpan 2019 jylǵy málimet boiynsha, 12 249 kópbalaly ana járdemaqy alady, onyń ishinde 5557 «Kúmis alqa», 3594 «Altyn alqa» iegerleri, 10 jáne odan da kópbala tárbielep otyrǵan 983 batyr ana bar. Memleketten járdemaqy alatyn analardyń jalpy sany - 22 383 adam. Oblysta ataýly áleýmettik kómekti 2035 otbasy (10949 adam) alady.
