Foto: Videodan alynǵan skrin
Atyraý oblysy Qurmanǵazy aýdanynyń birneshe aýylynda belgisiz indetten túieler qyrylyp jatyr. Jaýapty mamandar maýsym aiynan beri 200-den asa túie aýyryp, 84-i qyrylǵanyn rastap otyr, dep habarlaidy Kazinform.
Indet taraǵan Qurmanǵazy aýdanynyń Dyńǵyzyl, Eńbekshi, Maqash aýyldaryndaǵy ahýal kúrdeli. Al turǵyndar mundai jaǵdai byltyr da tirkelgenimen mal shyǵyny kóp bolmaǵanyn aitady.
— Meniń ózimnen qazir 5 analyq túie, 2 bota óldi. Dárigerler qolynan kelgenshe kómektesip jatyr. Biz tek sol malmenen kún kórip otyrmyz, — deidi Dyńǵyzyl aýylynyń turǵyny Fazilia Qabdolova.
Turǵyndar túiden bólek jylqy malynan da belgisiz aýrý shyqqanyn aityp, alańdaýshylyq bildirip otyr.
Mamandar aýyrýdyń sebebin anyqtaý maqsatynda synama alyp, zerthanaǵa jibergen. Biraq, Ulttyq referenttik veterinariialyq ortalyq qozdyrǵashtardyń joǵyn anyqtaǵan.
— Oblys ákimdigi tarapynan Aýyl sharýashylyǵy ministrligi Veterinarlyq baqylaý jáne qadaǵalaý komitetine usynys hat joldap, osy indettiń naqty neden paida bolǵanyn anyqtaý maqsatynda arnaiy mamandardy jiberýin suradyq. Sol boiynsha qazir habar kútip otyrmyz, — dedi Oblystyq aýyl sharýashylyǵy jáne jer qatynastary basqarmasy veterinariia bóliminiń bas mamany Yqylas Azamatov.
Qurmanǵazy aýdanynda kúiisinen jańylyp, belgisiz aýrýǵa shaldyqqan 47 túieni mal dárigerleri emdep jatyr. Al ólekselerdi jergilikti ákimdik pen veterinariialyq qyzmet mamandary talapqa sai joiýǵa kiristi.
