Atyraý oblysy ákiminiń orynbasary biýdjet qarajatyn ysyrap etti degen kúdikke ilingen, dep habarlaidy QazAqparat.
Oblys ákimi baspasóz qyzmetiniń taratqan aqparatyna qaraǵanda, Atyraý oblysy ákiminiń orynbasary Qairat Nurlybaev prokýrordyń 2021 jylǵy 13 shildedegi qaýlysymen qylmystyq is boiynsha kúdikti dep tanylǵan.
«Oblys ákiminiń orynbasary 83,7 mln teńge kólemindegi investitsiialyq sýbsidiiany «Buiyrǵyn» aýylsharýashylyq óndiristik kooperativine zańsyz tóleý faktisi boiynsha biýdjet qarajatyn ysyrap etti degen kúdikke ilinip otyr. Qairat Nurlybaev oblystyq aýyl sharýashylyǵy basqarmasyn basqaryp turǵan kezde (atalǵan laýazymǵa ol 2019 jylǵy 5 maýsymda taǵaiyndalǵan), iaǵni 2019 jyldyń 26 maýsymy men 4 jeltoqsany aralyǵynda investitsiialyq sýbsidiia kelisimshartyn jasaǵan jáne investitsiialyq sýbsidiiany tólegen. Búgingi kúnge deiin «Buiyrǵyn» kooperativi 83,7 mln teńge kólemindegi boryshty tolyqtai ornyna keltirdi» dep aqparat taratty ákimdiktiń baspasóz qyzmeti.
Qairat Nurlybaev oblys ákiminiń orynbasary laýazymyna biylǵy qańtarda taǵaiyndalǵan edi.
