Atyraýda sot aimaq ákiminiń birinshi orynbasary men basqarma basshysyn eki aiǵa tutqyndaý týraly sheshimdi maquldady, dep habarlaidy "Ult aqparat" oblystyq sottyń baspasóz qyzmetine silteme jasap.
Sot Atyraý oblysy ákiminiń birinshi orynbasary Nurlan Taýbaev pen oblystyq qurylys basqarmasynyń basshysy Timýr Basarovty 2 ai qamaýǵa alý týraly sheshimdi maquldady. Olar tergeý izoliatoryna qamaldy.
«Qylmystyq is QR QK 366-babynyń 4-bóligi boiynsha tergelip jatyr. Eger olardyń kinási dáleldense, olarǵa 80 eselengen para mólsherinde aiyppul salynady nemese múlki tárkilenip, 10 jyldan 15 jylǵa deiin bas bostandyǵynan aiyrylady» dep habarlady oblystyq sottyń baspasóz hatshysy Boranbai Galiev QazAqparat tilshisine.
10 qyrkúiekte N.Taýbaev pen T.Basarov 182 million teńge kóleminde para aldy degen kúdikpen ustalǵan bolatyn.
