Atyraý munai óńdeý zaýytynyń óndirisi tolyǵymen toqtap tur. Qazir munaidy bastapqy aidaityn eki qondyrǵysy jumys isteidi, dep habarlaidy «QazAqparat» agenttigi.
Atyraý munai óńdeý zaýytynyń bas direktory Murat Dosmuratovtyń málimetinshe, kenetten eki jelide elektr energiiasyn berý toqtatylǵan.
«Sonyń saldarynan bastapqyda zaýyttyń eki qondyrǵysy toqtatyldy. Sodan keiin is júzinde barlyq óndiristiń jumysy toqtap qaldy. Elektr energiiasyn «Atyraý-Jaryq» kompaniiasynan alamyz. Qazirgi ýaqytta munaidy bastapqy aidaýdyń tek eki qondyrǵysynyń jumysyn saqtap qalýǵa múmkindik týdy. Qondyrǵylardy paidalanýdan shyǵarý kezinde barlyq gaz alaý sharýashylyǵyna jiberildi. Bul qondyrǵylardyń depressiiasy bolmaýy úshin avtomatty túrde jasalady. Zaýyt qondyrǵylaryna kelgen ziian týraly aitýǵa áli erterek. Bul qondyrǵylardy iske qosý kezinde anyqtalady», - dep málim etti zaýyttyń bas direktory Murat Dosmuratov.
Budan buryn Atyraý munai óńdeý zaýytynda elektr qýaty sónip, qondyrǵylar toqtatylǵanyn habarlaǵan edik.
Atyraý munai óńdeý zaýytynyń qoǵammen bailanys bóliminiń málimetinshe, «KEGOC» AQ elektr qýatyn jospardan tys toqtatyp tastaǵan. Osyǵan bailanysty zaýyt jumysy avariialyq jaǵdaida toqtatylǵan. Bul óndiristiń jumysyna keri áserin tigizedi.
Osyǵan bailanysty Atyraý ekologtary Atyraý ekologtary munai óńdeý zaýyty mańynda aýadan synama alýdy bastaǵan edi.
Oblystyq ekologiia departamentiniń baspasóz qyzmetinen málim etkendei, zerthanalyq-taldamalyq baqylaý bóliminiń mamandary Atyraý munai óńdeý zaýytynyń sanitarlyq-qorǵanysh aimaǵynyń shekarasynda atmosferalyq aýanyń synamalaryn alýǵa kiristi.
«Jedel áreket etý maqsatynda departamenttiń zerthanalyq-taldamalyq baqylaý bóliminiń mamandary Atyraý munai óńdeý zaýytynyń sanitarlyq-qorǵanysh aimaǵynyń shekarasynda atmosferalyq aýanyń synamalaryn alyp jatyr. Synamalardy taldaý qorytyndysy qosymsha habarlanady», -dep málim etti departamenttiń baspasóz qyzmetinen.
