Atyraý munai óńdeý zaýytyndaǵy 27 tehnologiialyq qondyrǵyda josparly jóndeý jumystary júrgiziledi. Jóndeý jumystary 15 qyrkúiekte bastalady. Qazir zaýytta janarmai qory jasaqtalyp jatyr, dep habarlaidy QazAqparat.
Zaýyttyń bas direktory Murat Dosmuratovtyń málimetinshe, negizgi maqsat – ónerkásiptik qaýipsizdik talaptaryna jáne jabdyqtar men qubyrlardy, elektr jabdyqtaryn, tehnologiialyq protsesterdi basqarýdyń avtomattandyrylǵan júiesin, baqylaý-ólsheý aspaptaryn kýálandyrýǵa bailanysty josparly jóndeý júrgizý.
«Bizdiń zaýytta munaidy qaita óńdeýdiń eki aǵyndy tizbegi bar. Bul nysandardyń kezekpen toqtatylyp, iske qosylýyna yqpal etedi. Energetika ministrligi bekitken kestege sáikes jóndeý júrgizý kezinde zaýyttyń 50-70% qýaty jumysyn jalǵastyra beredi. Bul kezde zaýyt jumysy tolyǵymen toqtatylmaidy», - deidi Murat Dosmuratov.
Onyń aitýynsha, qondyrǵylardyń jobalyq kórsetkishterine qol jetkizý, ekologiialyq parametrlerdi jaqsartý, avtomattandyrý quraldaryn retke keltirý úshin tehnologiialyq, kompressorlyq jáne dinamikalyq jabdyqty qaýipsiz ári senimdi paidalanýdy qamtamasyz etý ónerkásiptik qaýipsizdik talaptaryna sáikes atqarylady. Jóndeý kezinde katalizatorlardy aýystyrý, ishki inspektsiia, reaktorlyq, ydystyq, kolonnalyq, jylý almasý jabdyǵy men qubyr joldaryn tekserý jáne kýálandyrý júrgiziledi.
«Tehnologiialyq nysandar kezeń-kezeńimen jóndelip, zaýytty turaqty jumys rejimine kóshirý qarashanyń birinshi onkúndigine deiin júzege asyrylady. Otandyq naryqta janar-jaǵarmai maidyń tapshylyǵyn boldyrmaý úshin Atyraý munai óńdeý zaýyty jóndeý júrgizý bastalǵanǵa deiin qajetti rezerv daiyndaidy. Sol sebepten, qyrkúiek aiyna áleýmettik mańyzy bar munai ónimderiniń qoryn jasaqtaý kózdelip otyr. Onyń ishinde 75 myń tonna avtokólik janarmaiy, 115 myń tonna dizel otyny, 6 myń tonna reaktivti otyn, 5 myń tonna suiytylǵan gaz bar», - dep málim etti Murat Dosmuratov.
