Atyraýda aýa sapasyn, qysymyn jáne temperatýrasyn kórsetetin LED-ekran ornatyldy, dep habarlaidy "Ult aqparat" óńirlik «ATYRAY» telearnasynyń saityna silteme jasap.
«LED ekranda aýanyń qanshalyqty lastanǵany, qorshaǵan ortaǵa bólinetin ziiandy qaldyqtardyń mólsheri týraly aqparattar toptastyrylǵan. Aldaǵy ýaqytta dál osyndai qurylǵylardy temirjol vokzaly mańyndaǵy móltekaýdandarǵa, áýejai aýmaǵyna, D. Nurpeiisova kóshesine ornatamyz dep josparlap otyrmyz. Sebebi atalǵan jerler halyq kóp shoǵyralanatyn oryndar bolyp esepteledi. Negizgi maqsat – ekologiialyq monitoring boiynsha atqarylyp jatqan jumystardy halyqqa kórsetý», - dedi «Qazgidromet» RMK AOF direktorynyń orynbasary Joldasqali Telagisov.
Óńirdiń ekologiialyq ahýalyn kórsetetin LED-ekrandar búginde Pavlodar, Petropavl, Aqtaý, Oral, Qostanai jáne Almaty qalalarynda ornatylǵan. Budan bólek turǵyndar «AirKZ» mobildik qosymshasy arqyly aýa raiy men ekologiialyq ahýal týraly málimetterdi kóre alady.
