Atyraý qalasynyń kóshesinde túlki júr, dep habarlaidy QazAqparat.
Búgin áleýmettik jeli men WhatsApp messendjerinde kóshede júrgen túlki týraly video tarady. Video Atyraý qalasyndaǵy saýda úiiniń aldynda túsirilgen.
Oblystyq ańshylar men balyqshylar qoǵamynyń bas ańshysy Aleksandr Ivasenkonyń aitýynsha, túlki sekildi jabaiy ań qozǵalysy kóp qalaǵa kirmeidi.
«Túlki oba sekildi qaýipti infektsiialyq aýrýlardy taratatyn ańǵa jatady. Sondyqtan, mundai jabaiy ańnan saq bolý kerek», - deidi Aleksandr Ivasenko.
Al, Atyraý oblystyq orman sharýashylyǵy jáne janýarlar dúniesi aýmaqtyq inspektsiiasynyń bólim basshysy Mereke Shalharovtyń pikirinshe, bul qolda ustalǵan ań bolýy múmkin.
«Dúkenniń esigine kirgisi kelgen áreketine qaraǵanda, jyly jer izdegen sekildi. Dalada júrgen ańǵa uqsamaidy. Atyraýda ekzotikalyq jabaiy janýarlardy úide ustaýdy jaqsy kóretinder bar dep estidim. Al, qutyrý aýrýyna shaldyqty ma, joq pa, ony tek zerthanalyq taldaý arqyly anyqtaýǵa bolady», - deidi ol.
